د پوښتنې ځواب: د نصرت غوښتنه او حزب اوس په کوم پړاو کې دی؟

(د حزب التحریر د امیر، جلیل عالم عطاء بن خلیل ابو الرشته د خپله فېسبوک پاڼې «فقهي» له لارې د مینه والو پوښتنو ته د ځوابونو لړۍ)

Aysenur Cigci‎ ته

پوښتنه:

Es selamu alaykum Sheik. May Allah swt grant you for your deeds and help you on this noble way. I have a question about the method of prophethood for establishing the Khilafah. As we know there are 3 stages in this method…

……………..

From this paragraph I understand that the action of seeking Nusrah belongs to the second stage. I asked a few reliable persons of the party about this, but the idea about this concept was divided. Some say that the action of seeking Nusrah is an action of the third stage and other people say it belongs to the second stage and that this action goes paralel with interaction with the society.

Related to this answer, I want to know in which stage the party is at this moment.

Jazakallu Khairan… etc.

Um Zeyd, Belgium.

ځواب:

وعلیکم السلام ورحمة الله وبرکاته،

د «بدلون په اړه د حزب التحریر تګلاره» (منهج حزب التحرير في التغيير) له کتابګي څخه هغه برخه چې تاسو یې په اړه پوښتنه کړې، داسې ده:

«... حزب له دې مطالعې څخه دې پایلې ته ورسېد چې د نصرت غوښتنې عمل په لومړي پړاو کې له کلتوري (تثقیفي) کار او په دویم پړاو کې له تعاملي کار سره توپیر لري؛ که څه هم دا کار په دویم پړاو کې چې د تعامل پړاو دی، ترسره شو. دا د هغې طریقې برخه ده چې پیروي یې واجب ده، کله چې ټولنه د دعوت کوونکو پر وړاندې ودرېږي (جمود رامنځته شي) او پر هغوی اذیت او فشار زیات شي.

له همدې امله، حزب د هغو کارونو ترڅنګ چې ترسره کول یې، د نصرت غوښتنه هم زیاته کړه. حزب له هغو کسانو څخه نصرت غواړي چې د نصرت ورکولو وړتیا لري. دغه نصرت د دوو موخو لپاره غوښتل شوی دی:

لومړی: د ساتنې او خوندیتوب (حمایې) په موخه، ترڅو حزب وکولای شي په ډاډه زړه د دعوت رسولو چارې پر مخ یوسي.

دویم: واک ته رسېدل، ترڅو خلافت تاسیس شي او په ژوند، دولت او ټولنه کې د الله سبحانه وتعالی په نازل شوي قانون سره حکم بیا پیل شي.

د نصرت غوښتنې د کارونو ترڅنګ، حزب خپلو ټولو پخوانیو کارونو ته هم دوام ورکړی دی؛ لکه په حلقو کې متمرکزه زده کړه، ډله‌ییز کلتور، پر امت تمرکز ترڅو اسلامي فکر ورسره وي او عامه رایه ورته رامنځته شي، د استعمارګرو کفري دولتونو پر وړاندې مبارزه او د هغوی د پلانونو او توطیو افشا کول، له حاکمانو سره فکري او سیاسي مبارزه، او د امت د ګټو او چارو پالنه (تبني مصالح). حزب په دې هیله خپلو کارونو ته دوام ورکوي چې الله سبحانه وتعالی ده ته او اسلامي امت ته بریا او نصرت ور په برخه کړي، ترڅو دریم پړاو چې د راشده خلافت تاسیس دی، را ورسېږي او په هغه وخت کې مؤمنان د الله په نصرت سره خوشحاله شي.» (د منهج له کتابګي څخه اقتباس پای ته ورسېد).

تاسو پوښتنه کړې چې ایا د نصرت غوښتنې چارې د دویم پړاو (تعامل) برخه دي که د دریم پړاو (واک ترلاسه کول)... او همداراز پوښتنه مو کړې چې حزب اوس مهال په کوم پړاو کې دی...

موږ مخکې د ۱۳۳۴ هـ ق کال د شعبان په ۱۳مه (د ۲۰۱۳م کال د جون ۲۲مه) د دغې پوښتنې مفصل ځواب ورکړی و، داسې ښکاري چې تاسو هغه ځواب نه دی لیدلی، نو ځکه یې متن دلته درته راقلم کوم، چې ستاسو د پوښتنې او په ځانګړي ډول د لومړۍ برخې مستقیم ځواب دی:

«د نصرت غوښتنه د تعامل پړاو په وروستیو کې ده؛ نو که د ځواک خاوندانو (اهل القوة) اجابت وکړ او د بدلون وړتیا یې لرله، نو د الله په اذن سره دریم پړاو رانژدې شوی دی. موږ دا موضوع په خپلو کتابونو او په ځانګړي ډول په "المنهج" کې تشرېح کړې ده، او دلته ځینې روښانه ټکي درته وړاندې کوم:

۱- رسول الله ﷺ د تعامل پړاو په جریان کې د نصرت غوښتنه پیل کړه. کله چې ابو طالب وفات شو، د مکې ټولنه د رسول الله ﷺ پر وړاندې بنده او متجمده شوه. د ابو طالب په مړینې سره، قریشو رسول الله ﷺ ته اذیت او ځورونه تر هغه بریده ورسوله چې د هغه د اکا په ژوند کې یې د هغې هیله هم نه شوای کولای. په دې توګه د رسول الله ﷺ ساتنه (حمایه) د ابو طالب د ژوند د ورځو په پرتله کمزورې شوه. نو الله سبحانه وتعالی ورته وحې وکړه چې ځان په عربي قبایلو وړاندې کړي، ترڅو له هغوی څخه خوندیتوب او نصرت وغواړي، چې وکولای شي د الله هغه پیغام چې ورته لېږل شوی، په ډاډه زړه او خوندي ډول خلکو ته ورسوي. ابن کثیر په سیرت کې له علي بن ابي طالب څخه روایت کړی چې وايي: کله چې الله سبحانه وتعالی خپل رسول ته امر وکړ چې ځان عربي قبایلو ته وړاندې کړي، هغه ووت او زه او ابوبکر هم ورسره وو، تر دې چې منی ته ورسېدو او د عربو له یوې ناستې (مجلس) سره مخ شوو. همداراز ابن کثیر له ابن عباس څخه او هغه له عباس څخه روایت کوي چې ویې ویل: رسول الله ﷺ ماته وفرمایل:

«لا أرى لي عندك ولا عند أخـيك مَنَعَة، فهل أنت مخـرجي إلى السوق غداً حتى نقرّ في منازل قبائل النـاس - وكانت مجمع العرب - قال: فقلت هذه كِنْدَة وَلَفُّها، وهي أفضل من يَحُجُّ من اليمن، وهذه منازل بكر بن وائل، وهذه منازل بني عامر بن صعصعة، فاختر لنفسك، قال: فبدأ بكندة فأتاهم»

"زه له تایه او ستا له وروره کومه دفاع نه وینم، ایا سبا مې بازار ته بیولای شې ترڅو د خلکو د قبایلو په استوګنځایونو کې وګرځو -چې دا د عربو د راټولېدو ځای و-؟ عباس وايي: ما ورته وویل: دا "کنده" او ورسره قبایل دي، چې له یمن څخه د حج کوونکو غوره خلک دي؛ دا د "بکر بن وائل" ځایونه دي، او دا د "بني عامر بن صعصعه" ځایونه دي، نو خپل ځان ته انتخاب وکړه. عباس وايي: هغه له کندې څخه پیل وکړ او ورغی."

۲- د هغه وخت د ځواک خاوندانو (قبایلو) ته، چې رسول الله ﷺ ترې نصرت غوښت، دا په بشپړه توګه روښانه وه چې له هغوی څخه غوښتل شوې موخه دا ده چې د رسول الله ﷺ ساتنه وکړي او هغه ته زمینه برابره کړي چې د هغوی په منځ کې یو داسې نظام رامنځته کړي چې د الله سبحانه وتعالی احکام پکې پلي شي. یعنې هغوی په صریحه او روښانه توګه پوهېدل چې نصرت د داسې دولت د تاسیس لپاره دی چې واکمني او جهاد کوي... له همدې امله کله چې رسول الله ﷺ له بني عامر بن صعصعه څخه نصرت وغوښت، هغوی وویل: "که موږ ستا پر دې کار له تا سره بیعت وکړو او بیا الله ته پر خپلو مخالفینو برلاسی کړې، ایا له تا وروسته به واک زموږ وي؟" رسول الله ﷺ وفرمایل:

«الْأَمْرُ إلَى اللَّهِ يَضَعُهُ حَيْثُ يَشَاءُ»

"واک د الله په لاس کې دی، چې هر چېرته یې وغواړي ږدي یې."

هغوی وویل: ایا ستا لپاره زموږ غاړې د عربو نښه وګرځي، او کله چې الله ته برلاسی کړې، واک د نورو شي؟ موږ ستا دغه کار ته اړتیا نه لرو. نو هغوی انکار وکړ. دا پدې معنی ده چې هغوی پوهېدل نصرت د دولت د تاسیس لپاره دی، نو ویې غوښتل چې له رسول الله ﷺ وروسته د هغې واکمنان شي. همداراز بني شیبان رسول الله ﷺ ته وویل: "موږ د دوو اوبو (دوه ډوله ګاونډیانو) ترمنځ یو." رسول الله ﷺ وفرمایل: دا دوه اوبه څه دي؟ هغوی وویل: د کسری نهرونه او د عربو اوبه. موږ له کسری سره تړون کړی چې هیڅ نوی کار به نه کوو او هیڅ نوي کوونکي (محدث) ته به ځای نه ورکوو. زه وینم چې دا کار چې ته یې دعوت کوې، پاچاهان یې بد ګڼي. که غواړې چې موږ تاته پناه درکړو او د هغو اوبو له اړخه دې نصرت وکړو چې عربو ته نږدې دي، نو دا به وکړو. رسول الله ﷺ وفرمایل:

«ما أسأتم في الرد إذ أفصحتم بالصدق، وإن دين الله لن ينصره إلا من أحاطه من جميع جوانبه»

"تاسو په ځواب کې بدي ونه کړه ځکه چې په رښتینولۍ سره مو خبره روښانه کړه، او د الله د دین نصرت به یوازې هغه څوک کوي چې له ټولو خواوو یې احاطه کړي وي."

هغوی هم پوهېدل چې نصرت د واکمنۍ او د عربو او عجمو پر وړاندې د جهاد په مانا دی، نو هغوی له عربو سره پر جنګ موافقه وکړه خو له پارسیانو سره نه.

۳- بیا کله چې الله سبحانه وتعالی د دې چارې فیصله وکړه، د عقبه دویم بیعت ترسره شو چې په مدینه کې د دولت د تاسیس لپاره نصرت و، او له هغې وروسته دریم پړاو یعنې د دولت تاسیس پیل شو.

۴- له دې ټولو څخه په روښانه توګه څرګندېږي چې د نصرت غوښتنه له دریم پړاو څخه مخکې، یعنې په تعاملي پړاو کې وه.

۵- او دا هماغه کار دی چې حزب د تېرې پېړۍ په شپېتمو کلونو کې پیل کړ او تر اوسه پکې دوام لري. له الله سبحانه وتعالی څخه غواړو چې دا امت په داسې انصارو ونازوي چې د لومړنیو انصارو تاریخ راژوندی کړي، ترڅو د اسلام دولت، یعنې راشده خلافت تاسیس شي او د رسول الله ﷺ "العقاب" بیرغ په لوړو رپاند شي، او په هغه ورځ به مؤمنان د الله په نصرت سره خوشحاله شي...» (زموږ د تېر ځواب متن پای ته ورسېد).

خو دا چې حزب اوس په کوم پړاو کې دی، دا هم پورته روښانه شوه. په یقیني توګه حزب په دریم پړاو کې نه دی، ځکه دریم پړاو د واک ترلاسه کول او په دولت کې د اسلام هراړخیز او انقلابي پلي کول دي... او دا چاره تر اوسه د حزب لپاره نه ده پوره شوې... مګر حزب د تعامل پړاو په وروستیو کې دی، او د الله په اذن سره د راشده خلافت په تاسیسولو سره د اسلامي ژوند د بیا پیل لپاره په خورا جدي او هڅاند ډول کار کوي، ترڅو بشریت د جهالت او کفر له تیارو څخه وژغوري او د حق او اسلام نور ته یې راستانه کړي... حزب پوره یقین لري چې دا کار د الله په اذن سره کېدونکی دی، او د هرې وعدې لپاره یو ټاکلی وخت شته.

هیله لرم چې موضوع اوس روښانه شوې وي او د "المنهج" کتاب د هغې فقرې په پوهېدلو کې چې کوم ابهام و، هغه له منځه تللی وي.

ستاسو ورور عطاء بن خلیل ابو الرشته

د ۱۴۴۰ هـ ق کال د رجب ۲۲مه د ۲۰۱۹م کال د مارچ ۲۹مه

د امیر (حفظه الله) له فېسبوک پاڼې څخه د ځواب لینک: الفيسبوك

د امیر (حفظه الله) له ګوګل پلس پاڼې څخه د ځواب لینک: غوغل بلس