سوال کا جواب
سوال: (کینیا کے اپوزیشن لیڈر اوڈنگا نے پیر "22 اگست 2022" کو سپریم کورٹ میں صدارتی انتخابات کے نتائج کے خلاف باضابطہ اپیل دائر کی، جس میں ان کے مدمقابل سبکدوش ہونے والے نائب صدر ولیم روٹو کامیاب قرار پائے تھے۔ Associated Press کے مطابق اوڈنگا نے آج صبح سپریم کورٹ میں اعتراضات کے کاغذات جمع کرائے ہیں، جس پر قانون کے مطابق عدالت کو 14 دنوں کے اندر جواب دینا ہو گا... 22/08/2022، اناطولیہ ایجنسی)۔ 15 اگست 2022 کو ولیم روٹو کی اپنے حریف اوڈنگا کے خلاف کینیا میں 9 اگست 2022 کو ہونے والے صدارتی انتخابات میں معمولی فرق سے جیت کا اعلان کیا گیا تھا... اس انتخابی مہم میں سابق صدر کینیاٹا اپنے نائب ولیم روٹو کے مخالف اور اپنے حریف اپوزیشن لیڈر اوڈنگا کے حامی نظر آئے، جب ان کے درمیان صلح ہو گئی تھی۔ تو کیا یہ کینیاٹا کی کوئی چال تھی کہ وہ اپنے حریف اوڈنگا کے حامی اور اپنے نائب روٹو کے مخالف نظر آئیں تاکہ اپنے حریف کے خلاف اپنے نائب کی جیت کو یقینی بنا سکیں؟ اور کینیا کی طرف امریکی اقدامات کا کیا راز ہے؟ کیا امریکہ اور برطانیہ کے درمیان وہاں کوئی کشمکش چل رہی ہے؟
جواب: مذکورہ بالا سوالات کے جواب کی وضاحت کے لیے ہم درج ذیل امور کا جائزہ لیتے ہیں:
1- کینیا میں ہماری دلچسپی اس لیے ہے کہ یہ "شاخِ افریقہ" (Horn of Africa) کے خطے کا حصہ ہے، جو کہ ایک تزویراتی اور اقتصادی اہمیت کا حامل اسلامی علاقہ ہے۔ اس خطے کے اکثر لوگ مسلمان ہیں اور یہاں اسلام کی حکمرانی رہی ہے، اور یہ ممالک ایک دوسرے سے جڑے ہوئے ہیں کیونکہ ان میں سے اکثر برطانوی استعمار کے زیرِ تسلط رہے ہیں۔ کینیا مسلم زنجبار سلطنت سے وابستہ تھا یہاں تک کہ انیسویں صدی کے آخر میں یہ برطانوی استعمار کے قبضے میں چلا گیا۔ اگرچہ کینیا نے 1963 کے آخر میں آزادی حاصل کر لی تھی، لیکن یہ محض رسمی آزادی تھی، کیونکہ ایجنٹوں کے ذریعے اس کی برطانیہ سے وابستگی برقرار رہی۔ کینیا کی حکمرانی میں جومو کینیاٹا (رسمی آزادی سے لے کر 1978 تک)، ڈینیئل آراپ موئی (2002 تک)، موائی کِباکی (2013 تک) اور پھر پہلے صدر جومو کینیاٹا کے بیٹے اوہورو کینیاٹا یکے بعد دیگرے برطانیہ کے وفادار ایجنٹ کے طور پر اقتدار میں رہے۔ کینیاٹا نے 2017 کے انتخابات میں دوبارہ کامیابی حاصل کی۔ برطانیہ بڑی مہارت سے باپ کے بعد بیٹے اور ان ایجنٹ حکمرانوں کے ذریعے اپنے وفادار تیار کرتا ہے، جو کسی کو بھی اقتدار میں آنے نہیں دیتے جب تک کہ وہ ان جیسا ہی استعمار کا وفادار اور ایجنٹ نہ ہو۔
2- امریکہ اپوزیشن سے کچھ ایجنٹوں کو توڑنے میں کامیاب رہا ہے، خاص طور پر اوڈنگا کو، جن کا قبیلہ ملک کا تیسرا بڑا قبیلہ ہے۔ اسی لیے ملک میں ایک نوآبادیاتی سیاسی کشمکش شروع ہو گئی ہے جو قبائلی رنگ اختیار کر لیتی ہے۔ یہاں کی پارٹیاں قبائلی بنیادوں پر ہیں اور انہیں عام طور پر اپنے قبیلے کے لوگوں کی حمایت حاصل ہوتی ہے، چنانچہ قبائلی وابستگی ہی ایک پارٹی کے اراکین کے درمیان اصل رشتہ ہے۔ جب بھی یہاں انتخابات ہوتے ہیں، نتائج کے خلاف احتجاج میں قبائلی عصبیت کی وجہ سے خون بہایا جاتا ہے۔ ولیم روٹو، جن کی حالیہ انتخابات میں جیت کا اعلان ہوا ہے، کالینجن قبائل سے تعلق رکھتے ہیں جس سے سابق صدر ڈینیئل آراپ موئی کا تعلق تھا۔ روٹو اس بات پر فخر کرتے ہیں کہ انہوں نے اس سابق صدر سے سیاست سیکھی ہے اور وہ 1992 سے ان کی پارٹی سے وابستہ رہے۔
3- سرکاری نتائج کے مطابق روٹو کی جیت کا اعلان معمولی فرق سے کیا گیا، انہیں 50.5 فیصد جبکہ اوڈنگا کو 48.8 فیصد ووٹ ملے۔ یہ بات قابلِ غور ہے کہ سپریم الیکشن کمیشن میں تقسیم نظر آئی، کمیشن کے چیئرمین وافولا چیبوکاٹی نے کہا: "ہم نے اس سفر کو مکمل کیا جس نے کینیا کے لوگوں کے لیے آزاد، منصفانہ اور معتبر انتخابات کو یقینی بنایا، اور یہ کوئی آسان سفر نہیں تھا" جبکہ ان کی نائب جولیانا چیریرا نے کہا: "ہم ان نتائج کو تسلیم نہیں کر سکتے جن کا اعلان کیا جائے گا کیونکہ عام انتخابات کے اس آخری مرحلے کی نوعیت شفاف نہیں تھی" (BBC 15/8/2022)۔ انتخابی کمیٹی کے سات میں سے چار ارکان نے ان نتائج کو تسلیم کرنے سے انکار کر دیا جس سے دھاندلی کے شکوک و شبہات پیدا ہوئے۔ نتائج کے خلاف مظاہرے بھی ہوئے۔ اوڈنگا نے کہا: "کسی شک سے بچنے کے لیے، میں یہ دہرانا چاہتا ہوں کہ ہم کل مسٹر چیبوکاٹی کی طرف سے اعلان کردہ صدارتی نتائج کو مکمل طور پر اور بلا تحفظات مسترد کرتے ہیں" (اناطولیہ 16/8/2022)۔ انہوں نے سپریم کورٹ میں باضابطہ طور پر نتائج کو چیلنج کر دیا ہے۔ امریکی نیوز ایجنسی Associated Press کے مطابق "اوڈنگا نے آج صبح (22/8/2022) سپریم کورٹ میں اعتراضات کے کاغذات جمع کرائے جن کا جواب قانون کے مطابق 14 دنوں میں دیا جانا ضروری ہے"۔ اگر عدالت نے اپیل منظور کر لی تو قانون کے مطابق 60 دنوں میں دوبارہ انتخابات ہوں گے۔ یہ بات خارج از امکان نہیں ہے تاکہ اپوزیشن کو خاموش کیا جا سکے کیونکہ دونوں فریقوں کے درمیان فرق بہت کم ہے اور الیکشن کمیشن تقسیم کا شکار ہے، اور تاکہ کوئی ایسا تشدد اور بدامنی نہ ہو جس کے نتائج بھیانک ہوں۔ اس سے اپوزیشن کو یہ امید ملے گی کہ اگر دوبارہ انتخابات ہوئے تو وہ جیت سکتے ہیں، یا پھر دونوں فریقوں کے درمیان کسی سمجھوتے پر اتفاق ہو جائے گا جس کے تحت وزارتِ عظمیٰ کا عہدہ دوبارہ بحال کر کے اوڈنگا کو دے دیا جائے گا!
4- جیسا کہ معمول ہے، اپوزیشن ہارنے پر انتخابات میں دھاندلی کا دعویٰ کرتی ہے، خاص طور پر کینیا میں جب اپوزیشن امریکی نواز ہو اور جیتنے والا انگریزوں کا ایجنٹ ہو، اور اسی طرح ان ممالک میں اس کے برعکس ہوتا ہے جہاں امریکی ایجنٹوں کا غلبہ ہو۔ کیونکہ ہر فریق کسی بھی طریقے سے جیتنا چاہتا ہے اور اقتدار میں ہونے پر اپنا اثر و رسوخ استعمال کرتا ہے۔ 2007 کے انتخابات میں بھی ایسا ہی ہوا تھا جب دونوں فریقوں نے اپنی جیت کا دعویٰ کیا تھا، جس کے بعد تصادم شروع ہوا، خون بہا اور قبائلی حملوں کی وجہ سے تقریباً 1200 لوگ مارے گئے اور لاکھوں بے گھر ہوئے۔ لیکن اس صورتحال میں انگریزوں کی عیاری نے اپوزیشن کو روکنے کے لیے اپنا کردار ادا کیا، انہوں نے اوڈنگا کو وزیرِ اعظم کا عہدہ دے کر ایک جال بچھایا جبکہ کِباکی صدر رہے جن کے پاس تمام اختیارات تھے، اور وزیرِ اعظم کے اختیارات کے استعمال میں رکاوٹیں کھڑی کیں۔ لیکن کینیاٹا نے، جن کی 2013 کے انتخابات میں جیت کا اعلان ہوا تھا، اقتدار پر مکمل گرفت حاصل کرنے کے لیے وزیرِ اعظم کا عہدہ ہی ختم کر دیا۔ 2017 کے انتخابات میں بھی اپوزیشن نے دھاندلی کا دعویٰ کیا اور سپریم کورٹ سے دوبارہ انتخابات کا مطالبہ کیا، چنانچہ اکتوبر 2017 میں دوبارہ انتخابات ہوئے جن کا اپوزیشن نے بائیکاٹ کیا اور کینیاٹا اور ان کے نائب ولیم روٹو کی جیت کا اعلان کر دیا گیا۔ واضح رہے کہ سابق امریکی صدر براک اوباما نے کینیا نژاد ہونے کی حیثیت سے اس معاملے میں مداخلت کی تھی! انہوں نے پرامن رہنے اور انتخابی نتائج قبول کرنے کی دعوت دی تھی، کیونکہ وہ جانتے تھے کہ اگر انتخابات ہوئے تو انگریزوں کے ایجنٹ دوبارہ جیت جائیں گے کیونکہ ریاست پر ان کا کنٹرول برقرار ہے۔ اسی لیے وہ کینیا کے حکمرانوں پر اپنا احسان جتنا چاہتے تھے تاکہ ان پر اپنا اثر و رسوخ بڑھا سکیں اور کینیا میں امریکہ کے اثر و رسوخ کو مضبوط کریں اور دباؤ ڈالیں تاکہ مستقبل میں ان کے ایجنٹ اقتدار تک پہنچ سکیں۔ لیکن برطانیہ اپنے ایجنٹوں کے ذریعے ہر بار چال چلتا ہے تاکہ کینیا میں اپنے خطرے سے دوچار اثر و رسوخ کو برقرار رکھ سکے، چنانچہ اس کے ایجنٹ کینیاٹا نے ایسا ڈرامہ کیا جیسے وہ امریکی ایجنٹ اوڈنگا کے دوست ہیں اور اپنے ایجنٹ روٹو کو جتوا دیا۔
5- یہ پانچواں موقع ہے کہ رائلا اوڈنگا نے صدارتی انتخابات کے لیے اپنی نامزدگی کا اعلان کیا اور الیکشن لڑ کر ہار گئے۔ انہوں نے اس سے پہلے 1997، 2007، 2013 اور 2017 میں چار بار انتخاب لڑا لیکن کینیا کے سیاسی میدان پر قابض برطانوی ایجنٹوں نے انہیں جیتنے نہیں دیا۔ انہیں امید تھی کہ وہ اوہورو کینیاٹا کے جانشین بنیں گے جن کی صدارت کی دو مدتیں ختم ہو چکی ہیں اور وہ آئین کے مطابق تیسری بار انتخاب نہیں لڑ سکتے تھے۔ اوڈنگا نے 9 مارچ 2018 کو کینیاٹا سے ہاتھ ملا کر صلح کر لی تھی، یہ صلح ان کے حامیوں کے درمیان مہینوں کے خونی تصادم اور کینیاٹا کی جیت کو تسلیم نہ کرنے اور خود کو کینیا کا صدر قرار دینے کے بعد ہوئی تھی۔ اس مصافحہ کے ساتھ ہی انہوں نے اپنے درمیان اختلافات کے خاتمے اور کینیاٹا کی صدارت کو تسلیم کرنے کا اعلان کر دیا تھا۔ اوڈنگا نے کینیاٹا کی "حب الوطنی" کی تعریف کی کہ انہوں نے اس مکالمے کا آغاز کیا جس کی وجہ سے یہ صلح ہوئی۔ کچھ لوگوں نے سمجھا کہ ان کے درمیان کوئی معاہدہ ہوا ہے جس کے تحت اوڈنگا کینیاٹا کے جانشین بنیں گے یا یہ کہ اوڈنگا اب انگریزوں کے ایجنٹ بن گئے ہیں! لیکن کینیاٹا اور انگریزوں کے ایجنٹ اس صلح سے دھوکہ نہیں کھائے بلکہ انہوں نے اسے اپنے حق میں استعمال کیا۔ کینیاٹا نے انتخابی مہم کے دوران یہ دکھا کر ایک کھیل کھیلا کہ وہ اوڈنگا کی حمایت کر رہے ہیں اور کہا کہ "روٹو ملک کے سب سے بڑے عہدے کے مستحق نہیں ہیں اور انہیں یہ عہدہ نہیں ملنا چاہیے" جس پر روٹو نے جواب دیا: "کینیاٹا چاہتے ہیں کہ اوڈنگا ان کے جانشین بنیں کیونکہ وہ ایک کٹھ پتلی صدر چاہتے ہیں" (BBC 16/8/2022)۔
6- یہ معلوم ہے کہ روٹو کی پارٹی کا کینیاٹا کی پارٹی کے ساتھ 2012 میں الحاق ہو گیا تھا۔ اس کے بعد ان کی حکمران جماعت "جوبلی پارٹی" میں مزید وسعت آئی اور 8 ستمبر 2016 کو 11 جماعتوں کے انضمام سے ایک نئی صورت بنی تاکہ 2017 کے انتخابات لڑے جا سکیں، جس کی قیادت کینیاٹا نے کی جبکہ 2013 میں یہ محض ایک سیاسی اتحاد تھا۔ روٹو دونوں مدتوں میں ان کے اتحادی اور نائب رہے، اور وہ قدیم برطانوی ایجنٹ سابق صدر ڈینیئل آراپ موئی کے حامیوں میں سے تھے اور ان کی حمایت کے لیے نوجوانوں کو متحرک کرتے تھے، جس کی وجہ سے وہ ان کے منظورِ نظر بنے اور سرکاری عہدوں پر ترقی پاتے رہے۔ وہ وزیرِ داخلہ، وزیرِ زراعت اور اعلیٰ تعلیم کے وزیر کے طور پر کام کر چکے ہیں۔ بین الاقوامی فوجداری عدالت (آئی سی سی) نے کینیاٹا اور روٹو پر 2007 اور 2008 کے جرائم کا الزام لگایا تھا، لیکن یورپ کے زیرِ اثر عدالت نے کینیاٹا کو 2014 میں اور روٹو کو 2016 میں بری کر دیا تاکہ وہ دونوں مل کر 2017 کے انتخابات لڑ سکیں اور اپنی جیت کا اعلان کر سکیں، جس میں کینیاٹا صدر اور روٹو نائب صدر بنے۔ اسی لیے روٹو قدیم برطانوی ایجنٹوں میں سے ایک ہیں، لہذا یہ سوچنا غلط ہے کہ انہیں اتنی آسانی سے چھوڑ دیا جائے گا اور ان کی جگہ کسی معاہدے کے تحت امریکی ایجنٹ اوڈنگا کو لایا جائے گا، الا یہ کہ یہ انگریزوں کی عیاری پر مبنی کوئی سوچی سمجھی چال ہو!
7- کینیاٹا نے 26 سے 29 جولائی 2021 تک برطانیہ کا دورہ کیا اور وزیرِ اعظم جانسن سے ملاقات کی اور اعلان کیا کہ اس دورے کا مقصد "کینیا اور برطانیہ کے درمیان تزویراتی شراکت داری کو مضبوط بنانا" ہے اور دونوں فریقوں نے پانچ سال کے لیے دفاعی تعاون کے ایک نئے معاہدے پر دستخط کیے۔ یہ اعلان کیا گیا کہ اس معاہدے کا مقصد "مشرقی افریقہ میں مشترکہ سیکورٹی چیلنجوں کا سامنا کرنے کے لیے دونوں ممالک کے درمیان تعاون کو فروغ دینا اور مضبوط بنانا ہے" (BBC)۔ برطانیہ نے امریکہ کی طرح کینیاٹا کے دورے کے دوران Pandora Papers، انسانی حقوق اور بدعنوانی کے مسائل نہیں اٹھائے، کیونکہ وہ ان کا وفادار اور تابع ہے! واضح رہے کہ کینیا میں برطانیہ کے دو فوجی اڈے ہیں، جن میں سے ایک کینیا کے دارالحکومت نیروبی کے قریب ہے جس کا مقصد برطانوی اثر و رسوخ کے حق میں حکمرانی کو مستحکم کرنا اور اس اثر و رسوخ کے تحفظ کے لیے دوسرے علاقوں کی طرف حرکت کرنا ہے، اور دوسرا شمالی کینیا میں ہے جس کا مقصد ان برطانوی افواج کو تربیت دینا ہے جو صحرائی اور نیم صحرائی علاقوں میں لڑنے کے لیے تیار کی جاتی ہیں۔ برطانوی افواج وہاں برطانیہ میں موجود اپنی فوجی زمین سے چار گنا زیادہ رقبے پر اصلی ہتھیاروں اور گولہ بارود کے ساتھ جنگی مشقیں کرتی ہیں۔ میڈیا رپورٹس کے مطابق افغانستان میں لڑنے والی برطانوی افواج نے کینیا کے اسی اڈے پر تربیت حاصل کی تھی۔ اسی لیے ان برطانوی اڈوں کی موجودگی کی وجہ سے امریکہ کینیا کو خاص اہمیت دیتا ہے اور وہاں سے برطانیہ کا صفایا کرنے کی کوشش کر رہا ہے۔
8- ایسا معلوم ہوتا ہے کہ کینیاٹا کے دورہ برطانیہ کے دوران انگریزوں نے ان سے کہا کہ وہ امریکہ کا دورہ کریں تاکہ ان کے ساتھ ہمدردی کا اظہار ہو اور اوڈنگا کے ساتھ صلح کی تصدیق ہو سکے، تاکہ امریکہ مستقبل میں آنے والے انتخابات میں کوئی مداخلت نہ کرے۔ چنانچہ امریکہ کے دورے کی منصوبہ بندی کی گئی اور برطانیہ کے دورے کے تقریباً دو ماہ بعد یہ دورہ ہوا، اور امریکی صدر بائیڈن نے 14 اکتوبر 2021 کو کینیا کے صدر اوہورو کینیاٹا کا استقبال کیا، وہ پہلے افریقی صدر تھے جن کا بائیڈن نے استقبال کیا۔ وائٹ ہاؤس کی ترجمان جین ساکی نے بتایا کہ دونوں صدور ٹھوس دوطرفہ تعلقات کے ساتھ ساتھ "مقامی اور بین الاقوامی مالیاتی نظاموں میں شفافیت اور جوابدہی کی ضرورت" پر تبادلہ خیال کریں گے۔ کینیاٹا کا نام Pandora Papers میں آیا تھا، جو کہ تحقیقاتی صحافیوں کے بین الاقوامی کنسورشیم کی ایک رپورٹ ہے، جس میں کہا گیا تھا کہ کینیاٹا جو بدعنوانی کے خلاف لڑنے کا دعویٰ کرتے ہیں، اپنے خاندان کے چھ افراد کے ساتھ خفیہ طور پر 11 آف شور کمپنیوں کے نیٹ ورک کے مالک ہیں جن میں سے ایک کے پاس 30 ملین ڈالر کے حصص ہیں۔ اس معلومات کے جواب میں ساکی نے مزید کہا کہ "صدر نے ہمیشہ بین الاقوامی مالیاتی نظام میں بے ضابطگیوں کی مذمت کی ہے۔ اس کا مطلب یہ نہیں ہے کہ ہم ان لوگوں سے نہیں ملیں گے جن سے ہم اختلاف کرتے ہیں۔ کئی ایسے موضوعات ہیں جن پر کینیا کے ساتھ کام کرنا ہمارے مفاد میں ہے اور یہی (دونوں صدور کی ملاقات کا) اصل مقصد ہو گا"۔ اور یہ کہ دونوں صدور "جمہوریت کے دفاع، انسانی حقوق، امن و سلامتی کے فروغ، اقتصادی ترقی کی رفتار بڑھانے اور موسمیاتی تبدیلیوں سے نمٹنے" پر بات کریں گے (فرانس پریس 14/10/2021)۔
چنانچہ امریکہ نے کینیاٹا پر دباؤ کے حربے استعمال کرنے کی کوشش کی تاکہ وہ اس کے امیدوار اوڈنگا کی حمایت کا اعلان کریں، اور انہوں نے ایسا ہی کیا اور بظاہر اوڈنگا کے حامی نظر آئے، لیکن یہ حمایت سنجیدہ نہیں تھی بلکہ ایک منافقت تھی تاکہ وہ اپنے اسکینڈلز پر پردہ ڈال سکیں اور امریکہ انہیں اچھالے نہ، کیونکہ ان کے لیے تیسری مدت کے لیے انتخاب لڑنا مشکل تھا اور امریکہ نے اس کی مخالفت کا اشارہ دے دیا تھا... امریکی وزیرِ خارجہ بلنکن نے 17 نومبر 2021 کو کینیا کا دورہ کیا جو ان کے افریقی دورے کا حصہ تھا جس میں نائیجیریا اور سینیگال بھی شامل تھے۔ انہوں نے نائیجیریا کے دارالحکومت میں کہا: "حکومتیں کم شفاف ہوتی جا رہی ہیں۔ یہ پورے افریقہ میں ہو رہا ہے، لیڈر مدتِ ملازمت کی حدود کو نظر انداز کر رہے ہیں، انتخابات میں دھاندلی کر رہے ہیں یا انہیں ملتوی کر رہے ہیں، اور اقتدار حاصل کرنے اور اسے برقرار رکھنے کے لیے سماجی شکایات کا فائدہ اٹھا رہے ہیں، اپوزیشن شخصیات کو گرفتار کر رہے ہیں اور میڈیا کو دبا رہے ہیں..." (Asharq Al-Awsat 21/11/2021)۔
صورتحال ایسی ہی تھی، کینیاٹا کی پارٹی کے لوگ روٹو کے لیے حمایت جمع کرنے میں مصروف تھے، اور یہ پارٹی کے اندر ایجنٹوں کے درمیان ایک اندرونی معاہدہ تھا جو اس کھیل کو سمجھتے تھے، چنانچہ انہوں نے مخالفت کا دکھاوا کرنے کے باوجود روٹو کو ہی منتخب کیا۔
9- یورپی اثر و رسوخ کے زیرِ اثر بہت سے افریقی ممالک، بشمول کینیا اور سینیگال، امریکہ کے مقابلے میں چین سے مدد لینے کی کوشش کر رہے ہیں جو وہاں اپنا اثر و رسوخ پھیلانے کی کوشش کر رہا ہے۔ سینیگال، جو فرانسیسی اثر و رسوخ میں ہے، چین کے ساتھ اپنے تعلقات مضبوط کر رہا ہے۔ اس نے 29 اور 30 نومبر 2021 کو اپنے دارالحکومت ڈاکار میں چین-افریقہ تعاون فورم کی میزبانی کی اور سینیگال کی وزیرِ خارجہ عیساتا تال سال نے کہا: "ہمارے پاس ایک خود مختار سفارت کاری ہے جس سے ہم کسی کو خارج نہیں کرتے"۔ جبکہ افریقہ میں امریکہ کا اثر و رسوخ برطانوی اور فرانسیسی اثر و رسوخ کے مقابلے میں محدود ہے، اس لیے وہ اسے مختلف طریقوں سے مضبوط کرنے کی کوشش کر رہا ہے اور چین کے اقتصادی اثر و رسوخ کا مقابلہ کرنے کی کوشش کر رہا ہے جس سے برطانیہ اور فرانس اپنے افریقی ایجنٹوں کو تحفظ دینے کے لیے مدد لیتے ہیں۔ حال ہی میں چینی اسٹیٹ کونسلر اور وزیرِ خارجہ وانگ ای نے 6 جنوری 2022 کو کینیا کا دورہ کیا اور صدر کینیاٹا سے ملاقات کی جنہوں نے کہا: "چین نہ صرف کینیا کا مخلص دوست ہے بلکہ قریبی تعاون کا ترقیاتی شراکت دار بھی ہے... کینیا کی ترقی کی کامیابیاں چین کی بھرپور حمایت کے بغیر ممکن نہیں تھیں... کینیا مشترکہ ترقی کے حصول کے لیے چین کے ساتھ باہمی طور پر فائدہ مند تعاون کو مزید گہرا کرنے کے لیے تیار ہے"۔ جبکہ چینی وزیرِ خارجہ وانگ ای نے کہا "چین کینیا کے ساتھ ہمہ جہت تعاون کو مضبوط بنانا چاہتا ہے تاکہ اسے اپنی ترقی کی صلاحیتوں کو بڑھانے، صنعت کاری کو تیز کرنے اور بین الاقوامی اور کثیر جہتی امور میں یکجہتی اور ہم آہنگی کو فروغ دینے میں مدد مل سکے"۔ وانگ نے "شاخِ افریقہ میں پرامن ترقی کا اقدام" پیش کیا اور کینیاٹا نے کہا "یہ اقدام شاخِ افریقہ کے ممالک کی فوری ضروریات کو پورا کرتا ہے اور کینیا اس سلسلے میں اپنا کردار ادا کرنے پر متفق ہے" (Xinhua 6/1/2022)۔ یہ سب امریکہ کو پریشان کرتا ہے جو افریقہ میں یورپی اثر و رسوخ کو ختم کرنے اور چین کی بڑھتی ہوئی طاقت کو محدود کرنے کی کوشش کر رہا ہے۔
10- خلاصہ یہ ہے کہ کینیا میں برطانوی اثر و رسوخ اب بھی مضبوط ہے اور زیادہ تر سیاسی کھلاڑی اس کے ایجنٹ ہیں، وہ ضرورت پڑنے پر انہیں متحد کر دیتی ہے اور ضرورت پڑنے پر انہیں الگ کر دیتی ہے۔ اگر اس کے ایجنٹوں اور امریکی ایجنٹوں کے درمیان معاہدہ اور اقتدار کی شراکت ضروری ہو جائے جبکہ اصل لگام اس کے ہاتھ میں رہے، تو وہ ایسا کرتی ہے اور اپنے ایجنٹوں کو صلح اور معاہدہ کرنے کی ہدایت دیتی ہے۔ اگر وہ اپنے ایجنٹ روٹو کو اقتدار میں مستحکم کرنے اور اپوزیشن کو خاموش کرنے میں کامیاب ہو جاتی ہے، تو وہ اپنے ایجنٹ کو ایسا کرنے کی ہدایت نہیں دیتی، کیونکہ وہ اس کے اشارے کے منتظر ہیں اور امریکی ایجنٹوں کی طرح محض اقتدار کے طالب ہیں۔ ہر ملک میں ایجنٹوں کا یہی شیوہ ہے۔ جہاں تک امریکہ کا تعلق ہے، وہ میدان نہیں چھوڑے گا اور کینیا میں اپنا اثر و رسوخ بڑھانے کی کوشش جاری رکھے گا، اور اسے اس سے کوئی فرق نہیں پڑتا کہ وہاں یا دوسرے افریقی ممالک میں خون خرابہ، افراتفری اور بدامنی پھیلے۔ وہ مختلف ذرائع اور طریقوں سے کام کر رہا ہے، چاہے وہ معاشی ہوں، سیاسی ہوں یا سیکورٹی اور فوجی سطح پر، چنانچہ وہ سیکورٹی سرمایہ کاری اور فوج و سیکورٹی فورسز کی تربیت میں مدد کے نام پر ان دونوں شعبوں میں ایجنٹ بنانے کی کوشش کرتا ہے، اور پھر وہ بغاوتوں کی منصوبہ بندی کرتا ہے جیسا کہ اس نے مالی میں کیا یا بغاوتیں اکساتا ہے جیسا کہ اس نے چاڈ میں کیا جس کے نتیجے میں فرانسیسی ایجنٹ ادریس ڈیبی مارا گیا۔
اسی طرح یہ ممالک، جن میں سے اکثر اسلامی ممالک ہیں، بین الاقوامی کشمکش کا اکھاڑا بنے ہوئے ہیں، خاص طور پر امریکہ، برطانیہ اور فرانس کے درمیان۔ ان ممالک کے لیے اس استعماری کشمکش سے چھٹکارا پانے کی کوئی امید نہیں ہے جو انہیں دولت سے مالا مال ہونے کے باوجود پسماندہ رکھے ہوئے ہے، سوائے اس کے کہ نبوت کے طریقے پر خلافت کی واپسی ہو۔ رسول اللہ ﷺ نے اس کے قیام کی بشارت دیتے ہوئے فرمایا:
ثُمَّ تَكُونُ خِلَافَةٌ عَلَى مِنْهَاجِ النُّبُوَّةِ
"پھر نبوت کے طریقے پر خلافت ہو گی۔" (احمد)
یکم صفر الخير 1444ھ 28/8/2022ء