(Silsila ya majibu ya mwanachuoni Ata Bin Khalil Abu Al-Rashtah, Amir wa Hizb ut-Tahrir kwa maswali ya wafuasi wa ukurasa wake wa Facebook)
Kwa Mysite Fantastica na kwa Абдуллах Ахъяров
Swali: Mysite Fantastica
Assalamu Alaikum, ndugu yangu mkarimu:
Je, unaweza kunijibu swali hili ukipenda?
Mimi ni kijana mseja, Mwislamu, ninampenda Allah (swt) na Uislamu, na ninapenda kutekeleza yale aliyokuja nayo kipenzi chetu na bwana wetu Muhammad (saw)...
Ninaishi katika mazingira yasiyo na dini wala maadili, Uislamu kwetu ni jina tu au alama tunayopewa... Shule zetu zinafundisha mitaala inayopinga Uislamu...
Swali: Sitaki kuoa, kwa sababu ninajua kuwa sitaweza kuwashikilia wanangu wa kiume na wa kike kwenye dini yangu ya Kiislamu "kana kwamba nimeshika kilingo cha moto".
Na ninajua kuwa wanangu watajifunza mambo yatakayowadhuru na sina muda wa kuwafundisha kwa sababu ya kazi yangu, na pia hali itamlazimu mke wangu kufanya kazi pia...
Kwa ufupi: Kuna hadith zinazosema kuwa ndoa ni nusu ya dini na nimezisoma kweli, na kuna hadith inayosema kwa maana yake kuwa waovu wa umma huu ni waseja, je, ni kweli kuwa nisipooa sitakamilisha dini yangu?...
Natumai kupata jibu kutoka kwako na nakushukuru sana.
Swali: Абдуллах Ахъяров
• Assalamu alaikum wa rahmatullahi wa barakatuh. Allah akulinde na akulipe Pepo. Nina maswali mawili.
Nataka kuoa na ninapopata habari kuhusu dada fulani, nitafuta walii wake ili kuchukua idhini ya kukutana na binti yake. Baba akiwa ni mshika dini, ndugu yetu, bila kunijua binafsi, anatoa idhini ya kuzungumza na binti yake na kwa kawaida mkutano hufanyika kwenye bustani au mkahawa (mahali pa umma). Je, si bora zaidi ikiwa mkutano huu ungefanyika nyumbani kwa msichana, kwani kwa kawaida wakati wa mkutano nje ya nyumba msichana huonyesha kusita na kukataa tu?
Hapa kwetu Crimea kuna ndugu wengi wanaotaka kuoa, lakini dada wengi wanapendelea masomo, wakidai kuwa ni Sunnah. Ningependa kujua kwa msichana mbele ya Allah, ni bora zaidi kuwa mwanafunzi katika taasisi ya kisekula au kuolewa?
Tafsiri ya Swali:
Assalamu Alaikum wa Rahmatullahi wa Barakatuh. Allah akulindeni na awaingize Peponi.
Nina maswali mawili:
1- Nataka kuoa, na ninapompata dada fulani na kumpata walii wake ili kuchukua idhini ya kukutana na binti yake, huyu baba mwenye msimamo na ambaye hanijui binafsi hunipa idhini ya kukutana na binti yake, na kwa kawaida mkutano huu hufanyika katika bustani ya umma au mkahawa. Je, si bora zaidi mkutano huu ufanyike nyumbani kwake? Hasa kwa kuwa akina dada huhisi kusita kwa sababu ya kuhisi kutokuwa na uzito wanapokutana nao kwenye bustani au mikahawa, jambo ambalo hupelekea dada huyo kukataa kuolewa mara nyingi.
2- Ndugu wengi hapa Crimea wanakusudia kuoa lakini dada wengi hutoa udhuru wa kutoolewa na kupendelea masomo kwa kisingizio kuwa masomo ni Sunnah. Na hapa ningependa kuuliza je, si bora zaidi mbele ya Allah (swt) kwa akina dada kuolewa na kupendelea na kutanguliza hilo kuliko kusoma katika taasisi hizi za kisekula?
Jibu:
Wa Alaikum Salaam wa Rahmatullahi wa Barakatuh.
Swali la "Mysite Fantastica" na swali la "Эмиль Сайфуллаев" (Абдуллах Ахъяров) yana mfanano kwa uhusiano wake na ndoa na mambo yake, na kwa hivyo jibu langu hapa chini ni kwa wote wawili, Allah (swt) awaongoze katika jambo lao lililo bora zaidi:
1- Hakika Allah (swt) alimuumba mwanadamu, na akajaalia katika ishara Zake (swt) kuwaumba wanandoa dume na jike, na akajaalia baina yao mapenzi na huruma kupitia ndoa kulingana na sheria, Amesema (swt):
وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ
"Na katika ishara Zake ni kuwa amekuumbieni wake kutokana na nafsi zenu ili mpate utulivu kwao, Naye amejaalia baina yenu mapenzi na huruma. Hakika katika haya kuna ishara kwa watu wanaofikiri." (QS. Ar-Rum [30]: 21)
2- Hakika Uislamu unahimiza ndoa, kwani ni kinga zaidi kwa macho, ni hifadhi zaidi kwa tupu, ni utulivu zaidi kwa nafsi, na ni kinga zaidi kwa dini:
- Bukhari ametoa kutoka kwa Abdullah (ra), amesema: Tulikuwa pamoja na Mtume (saw), akasema:
مَنِ اسْتَطَاعَ البَاءَةَ فَلْيَتَزَوَّجْ، فَإِنَّهُ أَغَضُّ لِلْبَصَرِ، وَأَحْصَنُ لِلْفَرْجِ، وَمَنْ لَمْ يَسْتَطِعْ فَعَلَيْهِ بِالصَّوْمِ، فَإِنَّهُ لَهُ وِجَاءٌ
"Yeyote mwenye uwezo (wa gharama na majukumu ya ndoa) basi na aoe, kwani hilo humfanya mtu ainamishe macho yake zaidi na hulinda tupu yake zaidi, na asiyeweza basi na afunge, kwani funga ni kinga kwake." (Imepokewa na Bukhari)
- Na Al-Hakim ametoa katika Al-Mustadrak kutoka kwa Anas bin Malik (ra), kwamba Mtume wa Allah (saw) amesema:
مَنْ رَزَقَهُ اللَّهُ امْرَأَةً صَالِحَةً، فَقَدْ أَعَانَهُ عَلَى شَطْرِ دِينِهِ، فَلْيَتَّقِ اللَّهَ فِي الشَّطْرِ الثَّانِي
"Yeyote ambaye Allah amemruzuku mke mwema, basi amemsaidia katika nusu ya dini yake, basi amche Allah katika nusu iliyobaki." Al-Hakim amesema hadith hii ina sanadi sahihi, na Adh-Dhahabi akakubaliana naye.
3- Kisha, yule anayetafuta ndoa ili ajistiri (kujiepusha na haramu) ni mmoja wa watu watatu ambao Allah (swt) huwasaidia. Ahmad ametoa katika Musnad yake kutoka kwa Abu Hurairah, kutoka kwa Mtume (saw) amesema:
ثَلَاثَةٌ كُلُّهُمْ حَقٌّ عَلَى اللهِ عَزَّ وَجَلَّ: عَوْنُهُ الْمُجَاهِدُ فِي سَبِيلِ اللهِ عَزَّ وَجَلَّ، وَالنَّاكِحُ لِيَسْتَعْفِفَ، وَالْمُكَاتَبُ يُرِيدُ الْأَدَاءَ
"Watu watatu ni haki kwa Allah (azz wa jall) kuwasaidia: Mujahid katika njia ya Allah (azz wa jall), anayeoa akitaka kujistiri, na mtumwa anayeandikiana na bwana wake ili ajikomboe anayetaka kulipa." (Imepokewa na Ahmad)
4- Hakika Mtume wa Allah (saw) alikataza kuacha kuoa kwa mwenye uwezo. An-Nasa'i ametoa kutoka kwa Samura bin Jundub, kutoka kwa Mtume (saw) kwamba:
أَنَّهُ نَهَى عَنِ التَّبَتُّلِ
"Yeye (Mtume) alikataza utawa (kujitenga na wanawake/kuacha kuoa)." Ibn Majah pia ameitoa hadith hii.
5- Mtume (saw) amewausia mawalii (mababa) wanapofikiwa na mtu ambaye wanaridhia dini yake na tabia yake wamozeshe. At-Tirmidhi ametoa kutoka kwa Abu Hurairah amesema: Mtume wa Allah (saw) amesema:
إِذَا خَطَبَ إِلَيْكُمْ مَنْ تَرْضَوْنَ دِينَهُ وَخُلُقَهُ فَزَوِّجُوهُ، إِلَّا تَفْعَلُوا تَكُنْ فِتْنَةٌ فِي الأَرْضِ، وَفَسَادٌ عَرِيضٌ
"Akikuposeni yule ambaye mnamridhia dini yake na tabia zake, basi muozesheni; msipofanya hivyo, kutatokea fitna katika ardhi na uharibifu mkubwa." Ibn Majah ameitoa kwa tamshi: "Akikujieni yule ambaye mnamridhia tabia zake na dini yake basi muozesheni, msipofanya hivyo kutatokea fitna katika ardhi na uharibifu mkubwa."
6- Vilevile, Mtume (saw) ameusia achaguliwe mwanamke mwema mwenye dini ambaye atamhifadhi mumewe, watoto wake na nyumba yake. Bukhari na Muslim wametoa kutoka kwa Abu Hurairah (ra), kutoka kwa Mtume (saw) amesema:
تُنْكَحُ المَرْأَةُ لِأَرْبَعٍ: لِمَالِهَا وَلِحَسَبِهَا وَجَمَالِهَا وَلِدِينِهَا، فَاظْفَرْ بِذَاتِ الدِّينِ، تَرِبَتْ يَدَاكَ
"Mwanamke huolewa kwa sababu nne: kwa mali yake, kwa asili yake, kwa uzuri wake, na kwa dini yake. Basi chagua mwenye dini, mikono yako itapata heri (utafanikiwa)."
7- Ama kauli yako "na kuna hadith inayosema kwa maana yake waovu wa umma huu ni waseja", hadith hii ni dhaifu, nayo iko kama ifuatavyo: Ahmad ametoa katika Musnad yake kutoka kwa mtu mmoja, kutoka kwa Abu Dharr amesema: Alimwingilia Mtume wa Allah (saw) mtu mmoja anayeitwa Akkaf bin Bishr At-Tamimi, Mtume (saw) akamwambia: "Ee Akkaf, je unaye mke?" Akasema: Hapana... Akasema: "Hakika Sunnah yetu ni ndoa, waovu wenu ni waseja wenu...". Na hadith hii sanadi yake ni dhaifu kwa sababu ya kutokujulikana kwa mtu aliyepokea kutoka kwa Abu Dharr, na kwa sababu ya kutofautiana (idhtirab) kulikotokea katika sanadi zake. At-Tabarani ameitoa katika Al-Kabir na wengineo kupitia Baqiyyah bin Al-Walid, wote kutoka kwa Muawiya bin Yahya, kutoka kwa Sulayman bin Musa, kutoka kwa Makhul, kutoka kwa Ghudhaif bin Al-Harith, kutoka kwa Atiyyah bin Busr Al-Mazini amesema: Alikuja Akkaf bin Wada’a Al-Hilali kwa Mtume wa Allah (saw)... akaitaja. Na hii ni sanadi dhaifu kwa sababu ya Muawiya bin Yahya Al-Sadafi, na Baqiyyah bin Al-Walid pia ni dhaifu.
Kwa hiyo, waseja si lazima wawe watu waovu, bali waovu wanaweza kuwa waseja au wasio waseja kulingana na mwenendo wa kila mmoja wao.
Muhtasari: Hakika Mtume (saw) anahimiza ndoa kwa mwenye uwezo, kwani inamhifadhi zaidi mtu katika dini yake, inahifadhi zaidi tupu yake, na inainamisha macho yake... Kadhalika, (saw) anakataza utawa, yaani kujitenga na ndoa... Kwa hivyo, maadamu wewe ee muulizaji unao uwezo wa kuoa, basi ninakuusia uoe na uchague mwanamke mwema, na ujitahidi kadiri ya uwezo wako katika kujenga familia njema, na uwe mkweli kwa Allah (swt), na mkweli kwa Mtume wa Allah (saw), na hakika wewe kwa idhini ya Allah (swt) utaweza kuwalea wanako malezi mema, na Allah (swt) huwasimamia waja wema.
8- Ama yale yaliyokuja katika swali la kijana wa Ukraine, jibu lake ni kama ifuatavyo:
a- Hakika Mtume (saw) amemuusia anayetaka kumposa mwanamke amwone, kwani amesema (saw) katika hadith iliyotolewa na At-Tirmidhi kutoka kwa Bakr bin Abdullah Al-Muzani, kutoka kwa Al-Mughira bin Shu'ba, kwamba yeye alimposa mwanamke, Mtume (saw) akasema:
انْظُرْ إِلَيْهَا، فَإِنَّهُ أَحْرَى أَنْ يُؤْدَمَ بَيْنَكُمَا
"Mtazame, kwani kufanya hivyo kuna uwezekano mkubwa wa kuleta mapenzi na maelewano baina yenu." Na katika mlango huo kuna hadith kutoka kwa Muhammad bin Maslama, Jabir, Abu Humaid, Abu Hurairah na Anas "Hii ni hadith Hassan", na Al-Hakim pia ameitoa na kusema ni sahihi kwa sharti ya mashekhe wawili (Bukhari na Muslim) na Adh-Dhahabi amekubaliana naye.
Basi mposaji anaweza kwenda kwa watu wa msichana na kuona yale yaliyoruhusiwa, ambayo ni uso na viganja viwili, lakini haijuzu kwake kuwa faragha naye, au kutoka naye... kwa sababu yeye ni mgeni (ajnabi) kwake. Kwa hivyo, nilishangazwa na yale yaliyokuja kwenye swali kuwa ulipenda kumwona nyumbani kwao, lakini wakakuambia hapana bali toka naye wewe na yeye pamoja, umwone! Ni kana kwamba kuna mkanganyiko katika swali.
b- Ama yaliyokuja katika swali: Je, kukamilisha kwa mwanamke masomo ya chuo kikuu ni bora kuliko ndoa ikiwa amefikiwa na mchumba ambaye dini yake na tabia yake inaridhisha? Sahihi ni kile kilichokuja katika hadith ya Mtume wa Allah (saw) aliyoitoa At-Tirmidhi kutoka kwa Abu Hurairah amesema: Mtume wa Allah (saw) amesema: "Akikuposeni yule ambaye mnamridhia dini yake na tabia zake basi muozesheni, msipofanya hivyo kutakuwa na fitna katika ardhi na uharibifu mkubwa." Na Ibn Majah ameitoa kwa tamshi: "Akikujieni yule ambaye mnamridhia tabia zake na dini yake basi muozesheni, msipofanya hivyo kutakuwa na fitna katika ardhi na uharibifu mkubwa." Ni wazi kutokana na ushahidi huu kuna katazo la mkazo kwa mawalii wa mwanamke kukataa mposaji ikiwa hakuna chochote cha kulaumiwa katika dini yake na tabia yake, yaani si tu swala ya mtu na saumu yake... bali muamala wake na watu na tabia yake njema na kujifunga kwake katika yote hayo na hukumu za kisheria. Ikiwa wazazi watauliza kuhusu dini ya mwanamume na muamala wake na wengine kwa kujifunga na hukumu za kisheria, na ikawathibitikia kuwa dini yake na tabia yake zinaridhisha kwa idhini ya Allah, basi ni haramu kwa mawalii kukataa na kuzuia ndoa ya binti yao na mposaji huyo kwa kisingizio cha binti huyo kukamilisha masomo yake ya chuo kikuu, bali wakubali na wasimzuie binti yao kuolewa, kwani hilo ni hifadhi zaidi kwa dini na ni jambo lililo sawa zaidi kwa idhini ya Allah.
Mwishowe, ninakuusia kila mwenye uwezo wa kuoa aoe mwanamke mwema, kwani huyo ni wema wa duniani kama ilivyokuja katika Umdat Al-Qari Sharh Sahih Al-Bukhari kutoka kwa Ali (ra) kwamba "Wema duniani ni mwanamke mwema, na Akhera ni Pepo" iliyokuja katika aya tukufu:
رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ
"Mola wetu, tupe duniani mema na Akhera mema, na utuepushe na adhabu ya Moto." (QS. Al-Baqarah [2]: 201)
Ndugu yenu, Ata Bin Khalil Abu Al-Rashtah
Kiungo cha jibu kutoka ukurasa wa Amir kwenye Facebook
Kiungo cha jibu kutoka tovuti ya Amir
Kiungo cha jibu kutoka ukurasa wa Amir kwenye Google Plus