(Silsila ya majibu ya mwanachuoni Ata bin Khalil Abu Al-Rashtah, Amir wa Hizb ut-Tahrir, kwa maswali ya wageni kwenye ukurasa wake wa Facebook)
Kwa Irfan Abu Naveed
Swali:
Bismillahir Rahmanir Rahim
Ewe Sheikh wetu mkarimu: Fadhila za mwanachuoni mtukufu Ata bin Khalil - Mwenyezi Mungu akulinde -
Swali muhimu linalohusiana na Hizb ut-Tahrir nchini Indonesia:
Vijana wa Kiislamu nchini Indonesia wameniuliza kuhusiana na Hizb ut-Tahrir Indonesia ambayo imesajiliwa rasmi katika Wizara ya Mambo ya Serikali ya Jamhuri ya Indonesia, na nimeona baadhi ya watu (si wengi) wakidai jambo hili: Kwamba Hizb nchini Indonesia haitofautishi kati ya haki na batili, na tunajikinga kwa Mwenyezi Mungu kutokana na hilo.
1- Ni lipi jawabu toshelevu kuhusu suala hili, ewe Sheikh wetu?
2- Ni ipi hukumu ya kusajili Hizb katika serikali za Dar al-Kufr kama vile Indonesia? Na tafadhali utueleze namna ya kutoa dalili?
Al-Allamah Al-Shafi'i amesema katika Al-Umm: Kwamba halali katika Dar al-Islam ni halali katika Dar al-Kufr, na haramu katika Dar al-Islam ni haramu katika Dar al-Kufr... Tunataka kufaidika na elimu yako ewe Sheikh wetu, Mwenyezi Mungu akubarikie na aongoze hatua zako na akufanye kuwa tegemeo kwa Umma wa Kiislamu, na ninaomba Mwenyezi Mungu aliweke jambo hili katika mizani ya mema yako.
Ndugu yenu katika dini: Al-Faqir ila Allah, Irfan Abu Naveed
Jawabu:
Waalaykumus Salaam Warahmatullahi Wabarakatuh
Ndiyo ndugu yangu, hakika halali katika Dar al-Islam ni halali katika Dar al-Kufr, na haramu katika Dar al-Islam ni haramu katika Dar al-Kufr... Lakini swali lako linahusiana na mambo ya kiidara, na mambo haya yanaingia katika mlango wa mambo yaliyoruhusiwa (mubahat), yawe ni katika Dar al-Kufr au katika Dar al-Islam. Kwa mfano, kuwasilisha maombi ya kupata kitambulisho au pasipoti... au kufuata alama za barabarani, au kukata tiketi ya kusafiri kwa ndege au treni... au kuzingatia muda wa kazi katika ajira yako au chuoni au shuleni, au kuwepo kwa orodha ya mahudhurio mahali pa kazi... haya yote ni mambo ya kiidara yanayoruhusiwa, uwe uko katika Dar al-Kufr au katika Dar al-Islam, unaweza kuyazingatia. Bali unaweza kuhamisha baadhi ya mbinu za kiidara kutoka Dar al-Kufr kwenda Dar al-Islam, na kisa cha Umar kuchukua masjala (diwan) kutoka kwa Waroma na Waajemi, yaani kuandikisha majina ya raia kwa ajili ya kuwagawia ngawira, ni maarufu:
أخرج ابن أبي شيبة في مصنفه عَنْ أَبِي سَلَمَةَ، عَنْ أَبِي هُرَيْرَةَ، أَنَّهُ قَدِمَ عَلَى عُمَرَ مِنَ الْبَحْرَيْنِ، قَالَ: فَقَدِمْتُ عَلَيْهِ فَصَلَّيْتُ مَعَهُ الْعِشَاءَ، فَلَمَّا رَآنِي سَلَّمْتُ عَلَيْهِ فَقَالَ: «مَا قَدِمْتَ بِهِ؟» قُلْتُ: قَدِمْتُ بِخَمْسِمِائَةِ أَلْفٍ... فَقَالَ لِلنَّاسِ: «إِنَّهُ قَدِمَ عَلَيَّ مَالٌ كَثِيرٌ فَإِنْ شِئْتُمْ أَنْ نَعُدَّهُ لَكُمْ عَدًّا، وَإِنْ شِئْتُمْ أَنْ نَكِيلَهُ لَكُمْ كَيْلًا» ، فَقَالَ رَجُلٌ: يَا أَمِيرَ الْمُؤْمِنِينَ إِنِّي رَأَيْتُ هَؤُلَاءِ الْأَعَاجِمَ يُدَوِّنُونَ دِيوَانًا وَيُعْطُونَ النَّاسَ عَلَيْهِ، قَالَ: «فَدَوَّنَ الدَّوَاوِينَ وَفَرَضَ لِلْمُهَاجِرِينَ فِي خَمْسَةِ آلَافٍ خَمْسَةَ آلَافٍ وَلِلْأَنْصَارِ فِي أَرْبَعَةِ آلَافٍ أَرْبَعَةَ آلَافٍ، وَفَرَضَ لِأَزْوَاجِ النَّبِيِّ صَلَّى اللهُ عَلَيْهِ وَسَلَّمَ، فِي اثْنَيْ عَشَرَ أَلْفًا اثْنَيْ عَشَرَ أَلْفًا».
"Ibn Abi Shaybah amepokea katika Musannaf yake kutoka kwa Abu Salama, kutoka kwa Abu Hurairah kwamba alimjia Umar kutoka Bahrain. Akasema: Nikamjia na nikaswali naye swala ya Isha. Aliponiona alinisalimia kisha akasema: 'Umekuja na nini?' Nikasema: 'Nimekuja na laki tano...' Kisha akawaambia watu: 'Hakika nimeletewa mali nyingi, mkitaka tutawahesabia kwa hesabu, na mkitaka tutawapimia kwa kipimo.' Mtu mmoja akasema: 'Ewe Amir wa Waumini, hakika nimeona hawa Waajemi (watu wasio Waarabu) wakiandika rejesta (diwan) na kuwapa watu kupitia hiyo.' Akasema: 'Basi Umar akaanzisha rejesta (diwan), akawapangia Wahajiri elfu tano elfu tano, na Maansar elfu nne elfu nne, na akawapangia wake za Mtume (saw) elfu kumi na mbili elfu kumi na mbili.'" (Ibn Abi Shaybah katika Musannaf yake)
Sasa turejee kwenye swali lako: Ni ipi hukumu ya kusajili Hizb katika serikali nchini Indonesia?
Kilichotokea ni katika mlango wa kutoa habari na taarifa (al-ilm wal-khabar), yaani tunawajulisha jina la Hizb, mfumo wake na kazi yake... Na kutoa habari hiyo hakuna tatizo lolote, ikiwa tutapata anayekubali taarifa hiyo bila ya kulazimika kufuata sheria za kikafiri, basi tunasajili Hizb kama kitendo cha kiidara. Na kwa sasa, nchi hazikukubali kutusajili kwa msingi huu bila ya kufuata sheria za kikafiri isipokuwa nchi tatu: Lebanon, Indonesia, na Tunisia... Na hata hizi tatu, zinatafuta kila kisingizio ili kufuta usajili wa Hizb...
Na kwa habari tu, kutosheka na vyama kwa kutoa taarifa na habari pekee ni miongoni mwa athari za Dola ya Osmani (Ottoman). Sheria ya vyama ya mwaka 1909 ilikuwa inavitaka vyama tu kutoa taarifa ya anuani yake na makao makuu rasmi ya chama. Hata sheria hii bado inafanya kazi nchini Lebanon kwa sababu hawajakubaliana juu ya sheria mbadala mpaka sasa. Kwa hivyo, usajili wao wa Hizb huko uliandikwa ndani yake "kurejelea sheria ya 1909 ya Dola ya Osmani."
Kwa ufupi, haramu katika Dar al-Kufr ni haramu katika Dar al-Islam. Yaani pombe ni haramu katika Dar al-Kufr na Dar al-Islam, hivyo ikiwa Muislamu atakunywa pombe akiwa Dar al-Kufr, atakuwa amefanya haramu...
Kadhalika kwa upande wa mubah (yaliyoruhusiwa), ikiwa kufuata mambo ya kiidara kama vile muda wa kazi kuanzia saa mbili asubuhi mpaka saa nane mchana ni mubah katika Dar al-Islam, basi pia ni mubah katika Dar al-Kufr. Na hili linatumika katika kusajili Hizb, kutoa kitambulisho, au kutoa pasipoti... Lakini haijuzu kusajili Hizb kwa sharti la kufuata sheria za kikafiri, kwani hili ni haramu. Kadhalika haijuzu kutoa kitambulisho kwa sharti la kunywa pombe, hili halijuzu... na kadhalika.
Yaani mambo ya kiidara ikiwa ni mubah katika Dar al-Islam, basi ni mubah katika Dar al-Kufr ikiwa hayakuwekewa sharti la kufanya haramu. Na kile kilichofanyika kuhusu kusajili Hizb nchini Indonesia ni jambo la kiidara katika mlango wa kutoa habari na taarifa (al-ilm wal-khabar) bila ya kufuata sheria zozote za kikafiri. Na nchi yoyote itakayokubali kutusajili kiidara katika mlango wa kutoa taarifa na habari bila kufuata sheria za kikafiri, basi inajuzu kufanya hivyo. Lakini wakiweka sharti la kufuata sheria za kikafiri, basi ni haramu na haijuzu. Natumaini suala hili limekuwa wazi kwako.
Ndugu yenu Ata bin Khalil Abu Al-Rashtah
Kiungo cha jawabu kutoka ukurasa wa Amir kwenye Facebook
Kiungo cha jawabu kutoka tovuti ya Amir
Kiungo cha jawabu kutoka ukurasa wa Amir kwenye Google Plus