ای ربه! ستا رحمت غواړو
ای ربه! موږ لا تر اوسه پورې ستا لوري ته یو په بل پسې د لومړي نسل (الرعيل الأول) د لېږدېدو شاهدان یو. که څه هم دا ستا لخوا یو نعمت او فضل دی، ځکه هغوی له خپلو محبوبانو، محمد ﷺ او د هغه له اصحابو سره یوځای کیږي، خو موږ غوښتل چې هغوی د هغه خیر د حاصلاتو ریبلو شاهدان وای چې دوی کرلي وو، او د هغو پاکو نیالګیو له مېوو یې خوند اخیستی وای چې دوی ایښي وو. سره له دې، موږ یوازې دا وايو چې خیر په هغه څه کې دی چې سبحانه و تعالی غوره کړی دی، ولا حول ولا قوة إلا بالله.
ای ربه! موږ لا هم په یوه ستونزمنه او له ازغیو ډکه لاره روان یو، چې ظالمانو ترې چاپېره ده. سره له دې موږ ستا په اجازه د لارې د هوارولو لپاره هڅه او زیار باسو، د هغو وینو پروا نه کوو چې د ازغیو د ایستلو په پایله کې زموږ له لاسونو بهیږي. همدارنګه موږ د ظالمانو د ظلم د له منځه وړلو، د امت د ویښولو او نېکمرغۍ لپاره د هغوی پر وړاندې په کلکه ولاړ یو، نه د ظالمانو له بطش (سختې نيونې) او نه هم د هغوی له اذیت او حتی د هغوی په زندانونو کې له شهادت څخه وېرېږو... ای ربه! موږ د هغو شمعو په څېر یو چې سوځي ترڅو د اسلام په رڼا سره تیاره روښانه کړي، او د عمل کوونکو اجر څومره ښه دی.
ای ربه! موږ لا هم وینو چې دوستان مو د حقیقي رب لوري ته ځي پرته له دې چې موږ وکولی شو له هغوی سره وروستۍ مخه ښه وکړو. زما پلار وفات شو په داسې حال کې چې زه د ظالمانو په یوه زندان کې وم، بیا مې مور وفات شوه په داسې حال کې چې زه د ظالمانو په بل زندان کې وم، بیا مې مشر ورور وفات شو چې زه ترې لرې او په جلا وطنۍ کې وم، او اوس مې ورور، تره او عزیز ستا لوري ته انتقال شو او زه بیا هم ترې لرې او غریب یم.
إِنَّا لِلَّهِ وَإِنَّا إِلَيْهِ رَاجِعُونَ
"بېشکه موږ د الله یو او بېشکه موږ ورته بېرته ورګرځېدونکي یو." (سورة البقرة: ۱۵۶)
په پای کې، ای ربه! تا موږ ته د دعا کولو امر کړی او له موږ سره دې د قبلېدو وعده کړې ده، او ته سبحانه و تعالی په خپله وعده کې خلاف نه کوې. نو اې الله! دښمنان په موږ مه خوشحاله کوه، او هغوی ته دا توان مه ورکوه چې په موږ پورې ملنډې ووهي او ووایي: د خلافت بلونکي داسې کار کوي چې پایله نه لري، عمرونه یې تېر شول خو خلافت یې لا هم نه دی رامنځته شوی! اې الله! موږ ته په خپل ستر نصرت کې چټکتیا راوله، او پر موږ ښکاره فتحه (الفتح المبين) پرانیزه، ترڅو د ظالمانو پر وړاندې د خلافت غږ پورته کړو، په داسې حال کې چې په یو لاس کې مو لوأ او په بل کې رايه وي، او د هغوی پر وړاندې په زوره دا نارې وهو:
قُلْ مُوتُوا بِغَيْظِكُمْ
"ووايه: په خپله غوسه کې مړه شئ." (سورة آل عمران: ۱۱۹)
که تاسو په ناحقه پر موږ پورې ملنډې وهلې وي، نو موږ په حقه پر تاسو ملنډې وهلو، او تاسو به له ذلیلانو څخه یاست. اې ربه، آمین.
او د پای په پای کې، موږ له تایه دعا کوو ای ربه! چې له نن وروسته د لومړي نسل (الرعيل الأول) څخه هیڅوک وفات نه شي مګر دا چې په نږدې راتلونکي کې ستا په اجازه د قایم شوي خلافت تر سیوري لاندې وي.
الله تعالی دې زموږ پر فقید او عزیز، چې یو له نامتو عالمانو څخه و، زموږ او د ټولو مسلمانانو فقید، ابو غازي باندې رحم وکړي، او الله سبحانه و تعالی دې هغه له پیغمبرانو، صدیقینو، شهیدانو او صالحانو سره یوځای کړي، او هغوی څومره ښه ملګري دي.
ستا بنده ای ربه ستا د بښنې او نصرت هیله من
د ۱۴۲۹ هـ کال د شوال ۲۱مه ۲۰۰۸/۱۰/۲۰م