Jibu la Swali
Swali:
Sitisho la mapigano (hudna) ambalo Marekani na Urusi zilitumia muda mrefu wa mikutano kuliandaa — kiasi kwamba baadhi ya mikutano kati ya Kerry na Lavrov ilidumu hadi saa kumi — limevunjika. Marekani na Urusi zilishangilia hudna hiyo zikisema kuwa ni tofauti na zilizopita, na kwamba Marekani itahakikisha utekelezaji wake upande wake na wa upinzani... huku Urusi ikihakikisha utekelezaji wake upande wake na wa serikali... Lakini ghafla imevunjika na Marekani na Urusi zinaelekezeana lawama kuwa kila mmoja ndiye chanzo cha kufeli kwake! Je, hii inamaanisha kuwa mfululizo wa hudna zenye sifa mbaya umekwisha? Na ikiwa haujaisha, ni nini kinachoendelea sasa katika mgogoro wa Syria? Mwenyezi Mungu awalipe kila la kheri.
Jibu:
Mfululizo wa hudna zenye sifa mbaya haujamalizika kwa Marekani, isipokuwa matukio ya sasa yameilazimisha kuangalia upya hudna hiyo ili kuifanyia marekebisho na kuchukua kile kinachoweza kuitwa: "mapumziko ya mpiganaji" kwa ajili ya mashambulizi zaidi ya mabomu ili kuathiri makundi (fasil) na watu ili wajisalimishe katika mkutano mpya kati ya serikali na upinzani kulingana na makubaliano ya hudna yaliyofanyiwa marekebisho ambayo Marekani inayaandaa wakati wa mapumziko hayo! Hii ni kwa sababu Obama anataka kumaliza muda wake na aina fulani ya suluhisho kwa suala la Syria au angalau kuwakutanisha serikali na upinzani katika mkutano utakaompa mafanikio kidogo katika kipindi chake, akifuata nyayo za rais wa Kidemokrasia aliyemtangulia, Clinton, kuhusiana na kadhia ya Palestina. Pamoja na kwamba Clinton hakufanikisha alichotaka, Obama hakuchukua funzo na akadhani kuwa anaweza kufanya yale ambayo waliomtangulia walishindwa, bila kujua kuwa kufeli kwake kunazidi kufeli kwa mtangulizi wake! Ili jambo hili liwe wazi, ni lazima kupitia mambo yafuatayo:
1- Marekani ilijihusisha na kulazimisha hudna kwa dhati wakati Urusi na serikali zilipofanikiwa kuuzingira kikamilifu mji wa Aleppo baada ya kudhibiti sehemu muhimu za barabara ya Castello wakati wa mashambulizi makali ya Urusi na serikali. Kulingana na mwandishi wa Al Jazeera mnamo tarehe 07/07/2016 (... idadi ya mashambulizi yaliyofanywa na ndege za Urusi na ndege za serikali dhidi ya Aleppo ilizidi mashambulizi mia moja...), hivyo serikali iliweza kudhibiti barabara hiyo baada ya upinzani kujiondoa (Mwandishi wa Al Jazeera alinukuu vyanzo vya kijeshi kuwa wapiganaji wa upinzani wa Syria wenye silaha walijiondoa kwenye maeneo waliyoyadhibiti karibu na barabara ya Castello kaskazini mwa Aleppo kwa sababu za kijeshi...) (Al Jazeera, 10/07/2016). Kisha mashambulizi makali yaliendelea yaliyopelekea majeshi ya serikali yakisaidiwa na Urusi, Iran na wanamgambo washirika kuuzingira mji wa Aleppo mnamo tarehe 26/07/2016 (Majeshi ya serikali ya Syria yaliimarisha mzingiro kwenye mitaa ya mashariki mwa Aleppo baada ya kudhibiti siku ya Jumanne eneo la Castello kaskazini mwa mji...) (Al Jazeera, Jumatano 27/07/2016). Katika mazingira haya na wakati wa mkutano wa Waziri wa Mambo ya Nje wa Marekani na Waziri wa Mambo ya Nje wa Urusi huko Vientiane, mji mkuu wa Laos tarehe 26/07/2016, Kerry aliwaahidi waandishi wa habari kuwa atakuwa katika nafasi ya kuwaambia - yaani waandishi wa habari - kuhusu hatua chanya za kubadilisha hali ya vita nchini Syria mwanzoni mwa Agosti 2016, baada ya kujiridhisha na kusonga mbele kwa serikali kwenye barabara ya Castello kwa msaada wa Urusi na Iran, na kisha kuuzingira mji wa Aleppo, kwani Kerry alitaka kuidhinisha hudna wakati mzingiro huo umeshakamilika.
2- Lakini hilo halikutokea kutokana na operesheni kali za kijeshi zilizofanywa na wanamapinduzi (thuwara) kusini mwa Aleppo ambapo walifanikiwa kuvunja mzingiro katika sehemu yake ngumu zaidi, kusini mwa Aleppo na eneo la vyuo vya kijeshi, baada ya wanamapinduzi kuweza kuchukua mtaa wa Ramouseh kusini mwa Aleppo na kufungua njia kuelekea huko. Operesheni hizo za kuvunja mzingiro wa Aleppo zilikuwa pigo kubwa kwa mipango ya Marekani ambayo inaona kuupiga mmapinduzi ya Syria katika kitovu chake chenye nguvu na moto zaidi huko Aleppo. Marekani na Urusi zilipatwa na kiwewe, ambapo Urusi kupitia Waziri wake wa Mambo ya Nje Sergey Lavrov ilizielezea operesheni hizo za wanamapinduzi kuwa ni "vitendo vya jeuri," jambo linaloonyesha kuwa Urusi na Marekani zilidhani kuwa zimeushinda mmapinduzi nchini Syria na kuufanya ufifie.
3- Ili kufanikisha mipango ya Marekani ambayo sasa inalenga Aleppo, ilikuwa ni lazima kuuzingira mji huo upya, na hapa Marekani ilifanya kazi kwenye mhimili miwili ili kuurejesha mzingiro huo:
Kwanza: Kuliingiza jeshi la Uturuki kaskazini mwa Syria, kuanzia eneo la Jarabulus katika operesheni ambayo Uturuki iliiita "Euphrates Shield" (Kishindo cha Frati), na kuwaita wanamapinduzi "walio watiifu kwa Uturuki" kutoka kusini mwa Aleppo kwenda kupigana na kundi la ISIS, yaani kudhoofisha nyanja za mapambano ya kweli huko Aleppo na kutengeneza nyanja mpya za mapigano ya ndani, na kuwasukuma wanamapinduzi wengi kadiri inavyowezekana mbali na mstari wa mbele huko Aleppo!
Pili: Ilikuwa ni kuongezeka kwa uhamasishaji wa Iran kwa maelfu ya wafuasi wake na kuwatuma kusini mwa Aleppo, na matangazo ya chama chake huko Lebanon kutuma vikosi maalum kusini mwa Aleppo, pamoja na harakati ya Al-Nujaba ya Iraq, na wakati huo huo Urusi ilifanya mashambulizi makali ya anga kwenye eneo la Ramouseh...
Kupitia mhimili hii miwili, Marekani ilifanikisha kuiwezesha serikali na washirika wake kuuzingira mji wa Aleppo upya, na mitaa ya mashariki ikawekwa kwenye meza ya hila za Marekani chini ya majina ya "kupiga magaidi" na "msaada wa kibinadamu kwa raia huko Aleppo." Hapo ndipo wakati ukawa mwafaka kwa Marekani kutangaza makubaliano yake na Urusi na kulazimisha "kusitisha mapigano." Hili lilifanyika wakati wa mkutano wa mawaziri wa mambo ya nje wa pande hizo mbili, Marekani na Urusi, mjini Geneva uliodumu kwa zaidi ya saa kumi. Waziri wa Mambo ya Nje wa Marekani Kerry wakati huo alikuwa akiwasiliana na idara za usalama, haswa Pentagon huko Washington, ili kuhakikisha anafanikisha ombi la Urusi la kutekeleza operesheni za pamoja na za wazi kati ya Marekani na Urusi dhidi ya makundi ambayo hayatazingatia usitishaji mapigano.
4- Marekani na Urusi zilitangaza tarehe 12/09/2016 kuanza kusitisha "mapigano" nchini Syria baada ya kujihakikishia kuwa jeshi la serikali na washirika wa Iran na Urusi wameuzingira mji wa Aleppo upya... Pia tarehe hiyo ilianza jioni ya siku ya kwanza ya Eid al-Adha iliyobarikiwa, ili kutumia dhana ya "Eid" kuboresha nafasi za kukubaliwa kwa usitishaji mapigano nchini Syria.
5- Marekani ilikuwa makini katika kuyatoa makubaliano haya na kuyatekeleza (Waziri wa Mambo ya Nje wa Marekani Kerry aliyachukulia makubaliano haya ya Urusi na Marekani kuwa yanaweza kuwa fursa ya mwisho ya kuifanya Syria kuwa nchi ya kisekula na yenye umoja...) (Al Jazeera, matangazo ya moja kwa moja ya hotuba ya Kerry, 12/09/2016). Hii ni kwa sababu yanafikia lengo lake la kulazimisha usitishaji wa mapigano kama hatua ya awali ya kuweka kadhia ya Syria kwenye meza ya mazungumzo ya Geneva... Kwa upande mwingine, mpango huu kwa kuambatana na uchaguzi wa Marekani, unaleta faida za kisiasa kwa chama cha Kidemokrasia, faida ambazo ndizo zilizosababisha haraka ya Marekani kupata mafanikio kwa serikali ya Obama nchini Syria mwishoni mwa kipindi chake. Wakati huo huo, Urusi ilishangilia kwa sababu ya kukaribia kuanza kwa operesheni za kijeshi za pamoja na za wazi na Marekani, ambalo ni ombi la muda mrefu la Urusi linaloona kuwa ni msingi wa kuendelea kuitumikia malengo ya Marekani nchini Syria, ili kujihadhari na siasa zisizojulikana za serikali ijayo ya Marekani itakayofuata baada ya serikali ya Obama.
6- Lakini mambo yalikwenda kinyume na vile Marekani ilivyotaka, na mbele yake yakajitokeza mambo mawili ambayo hayakuwa kwenye mahesabu ya Marekani:
Kwanza: Licha ya jinai zote zilizofanywa na Marekani nchini Syria moja kwa moja kupitia muungano wake au kupitia washirika wake Urusi na Iran na wanamgambo wao huko Iraq na Lebanon, na licha ya kuwa makubaliano ya hudna yalifanyika wakati wa mzingiro mkali hususan huko Aleppo, jambo ambalo liliifanya Marekani, washirika wake na vibaraka wake kudhani kuwa watu wa Syria watakubali hudna hiyo, lakini kinyume chake ndicho kilitokea... Maandamano yalikuwa yakitokea chini ya mzingiro na kuzuiliwa kwa misaada ya chakula, na hata kushambuliwa kwake, maandamano yalikuwa yakitokea yakilaani kwa nguvu makubaliano ya hudna, jambo lililoyahimiza makundi kadhaa kutangaza kuwa hayahusiki na makubaliano hayo, hata kama yalisubiri kuona yatakayojiri! Makundi mengine yalipinga mwelekeo wa Marekani kulingana na makubaliano hayo wa kufanya mashambulizi ya pamoja na Urusi dhidi ya makundi inayoyaita "magaidi," na kuna makundi mengine yaliyopinga makubaliano hayo kikamilifu... Si hivyo tu, bali harakati za watu zilizokuwa zikishinikiza zilizuia hata makundi yanayounga mkono vibaraka wa Marekani kuonyesha msimamo wao wa kuunga mkono na kuwalazimisha kuuficha, jambo lililoifanya Marekani kutambua kuwa makubaliano yake ya hudna katika mazingira ya kukataliwa si yenye manufaa kama inavyotaka... Lakini kilichopoteza akili yake wakati wa jaribio la kutekeleza hudna hiyo ni tukio la wazi la baadhi ya pande za upinzani kukataa kuwapokea wanajeshi wa vikosi maalum vya Marekani kaskazini mwa Syria baada ya Erdogan kushangilia kuanza kwa hatua ya tatu ya "Euphrates Shield" kwa kushirikiana na vikosi vya Marekani... Lakini walishangazwa na upinzani mkali, si kutoka kwa wale wanaowaita wenye msimamo mkali pekee, bali pia kutoka kwa wale wanaowaita wa wastani, kwa kukataa kwao kupigana kando ya vikosi maalum vya Marekani. Upinzani huo uliambatana na mayowe yakiita vikosi hivyo kuwa ni "vya msalaba" (Crusaders), kama vyombo vya habari vilivyoripoti tukio hili mnamo 16/09/2016: (Video zilizosambazwa na wanaharakati na waandishi wa habari kwenye Twitter zilionyesha kile kinachoonekana kuwa wanajeshi wa vikosi maalum vya Marekani wakiondoka mji wa Al-Rai huko Aleppo, baada ya kufanyiwa dhihaka na wapiganaji wanaoaminika kuwa wa "Jeshi Huru la Syria." Video hii inakuja wakati gazeti la Wall Street Journal liliponukuu maafisa wa Marekani kuwa Rais Barack Obama aliidhinisha kutumwa kwa wanajeshi karibu arobaini wa operesheni maalum nchini Syria kufanya kazi na majeshi ya Uturuki kaskazini mwa Syria... Video hiyo inaonyesha katika mji wa Al-Rai wapiganaji wakipiga mayowe ya uadui dhidi ya Marekani wakati msafara wa magari ulikuwa ukisafirisha majeshi ya Marekani... Na mwanamume mmoja anasikika kwenye video akisema: "Wamarekani hawana nafasi kati yetu... wanataka kuanzisha vita vya msalaba ili kuikalia Syria kwa mabavu"...) (Tovuti ya Al-Bawaba, 16/09/2016), na gazeti la Daily Telegraph liliripoti mfano wa hayo tarehe 16/09/2016...
Jambo hili la kwanza liliifanya Marekani kuona kuwa inahitaji mapumziko ya mpiganaji! Kwa ajili ya mashambulizi zaidi kama kisasi kwa watu wa Syria waliosimama na bado wanasimama kidete dhidi ya jinai za Marekani na mipango yake, Marekani ikidhania kuwa kuongeza mashambulizi kutawafanya wajisalimishe, na dhana yake itamwangamiza Mungu akipenda.
Pili, makubaliano ya hudna hayakuwa ya kijeshi na misaada pekee, bali pia yalikuwa suluhisho la kisiasa. Obama alikuwa akitazamia kumaliza muda wake na suluhisho nchini Syria linalohifadhi ushawishi wa Marekani, na hivyo kukumbukwa na kumsaidia mgombea wa Kidemokrasia katika uchaguzi... Imeripotiwa katika habari kuwa makubaliano hayo yana takriban nyaraka tano: mbili kati yake ni kuhusu kusitisha mapigano na misaada ya chakula, na hizi ziliwekwa wazi... Lakini Marekani ilikataa kuweka wazi nyaraka tatu nyingine kwa sababu, inavyoonekana, zinahusu suluhisho la kisiasa na inaelekea zinaonyesha udanganyifu wa Marekani kwa upinzani wa wastani kuwa iko pamoja nao. Haiondoi uwezekano kuwa imeandikwa ndani yake kubaki kwa dikteta Bashar kama rais wa serikali ya mpito na hata kwenye uchaguzi baada ya hapo! Hivyo basi Marekani haitaki kufichua hilo mpaka imalize utayari wa kijeshi na misaada... Ilikuwa imekubaliana na Urusi juu ya jambo hili, na mambo yalikwenda kwa utulivu mwanzoni. Inaonekana kuwa Marekani ilisahau kuwa Ulaya, ambayo Marekani imeitenga na matukio yanayoendelea nchini Syria, haitaacha fursa yoyote ya kuleta "vurugu" kwake hata kama inajulikana kuwa Ulaya haina nafasi kubwa katika mgogoro wa Syria, lakini inaweza kuiaibisha Marekani... Na hili ndilo lililotokea! Ulaya ilijaribu kutumia nukta hii ambapo Ufaransa iliitaka Marekani kwa sauti ya juu kuweka wazi vipengele vya makubaliano hayo kwa washirika wake. Waziri wa Mambo ya Nje wa Ufaransa aliitaka Marekani kuwafahamisha washirika wake maelezo ya makubaliano na Urusi kuhusu kusitisha mapigano nchini Syria... (Waziri wa Mambo ya Nje wa Ufaransa Jean-Marc Ayrault amesema leo Alhamisi, Septemba 15, kuwa Ufaransa inataka kuona maandishi ya makubaliano ya kusitisha mapigano nchini Syria yaliyofikiwa na Marekani na Urusi ili kusiwe na utata kuhusiana na nani anayelengwa ardhini...) (Tovuti ya DW ya Kiarabu, 15/09/2015).
Inaonekana kuwa Waulaya walikusudia kuiaibisha Marekani na Urusi pamoja kuwa makubaliano hayo yana vipengele hatari...! Hata Urusi iliathirika na ikajaribu kujiokoa! Hivyo iliomba kuitishwa kwa kikao cha dharura cha Baraza la Usalama ili kutoa mwavuli wa kimataifa kwa makubaliano ya Marekani na Urusi, (Na Zakharova - msemaji wa Wizara ya Mambo ya Nje ya Urusi - alifafanua lengo la Moscow katika takwa hili muhimu, akibainisha kuwa makubaliano hayo yanajumuisha "nyaraka kadhaa, zilizoidhinishwa, na kukubaliwa wakati wa mchakato wa mazungumzo... na kwamba upande wa Urusi mwanzoni mwa mazungumzo na wakati wake, na baada ya kufikia makubaliano ya mwisho, uliwasilisha, bali uliuhimiza upande wa Marekani kuchapisha nyaraka hizi, na udharura wa kufanya hivyo ili makubaliano haya yasiwe kitu cha dhahania"...) (Arabi21, 16/09/2016). Lakini kikao cha dharura cha Baraza la Usalama usiku wa tarehe 16/09/2016 kilifutwa kutokana na Marekani kung'ang'ania kutofichua vipengele vya makubaliano, na bila shaka Urusi haiwezi kuvifichua peke yake kwa sababu inafanya kazi nchini Syria kwa idhini ya Marekani!
Jambo hili la pili liliifanya Marekani, ili kuepuka aibu hii, kutosheka na kurejea bila faida! Hivyo ikaona iandike upya makubaliano ya hudna ili Obama atosheke na aina fulani ya hudna inayopelekea jambo dogo kuliko suluhisho kamili, bali labda tu mkutano kati ya serikali na upinzani, na kisha makubaliano mapya yaondolewe nyaraka zenye kuaibisha!
7- Kutokana na mambo haya mawili yaliyokabiliana na Marekani, iliona ichukue "mapumziko ya mpiganaji" kwa ajili ya mashambulizi zaidi ya makali ili kuathiri makundi na watu ili wajisalimishe katika mkutano mpya kati ya serikali na upinzani kulingana na makubaliano ya hudna yaliyofanyiwa marekebisho ambayo Marekani inayaandaa wakati wa mapumziko hayo! Na ili kuhalalisha kusimamishwa kwa hudna kwa muda kwa namna iliyotajwa, na kuondoa tuhuma kuwa Marekani ndiyo inayohusika na kusitisha hudna na kuzidisha mashambulizi kwa makubaliano na Urusi na serikali, Marekani ilichukua hatua zifuatazo:
a- Kuiambia Urusi: (Kuna ugumu wa kutofautisha kati ya upinzani wa wastani na "magaidi" nchini Syria...) (Chaneli ya Al-Hadath, 19/09/2016).
b- Kuifanya serikali itangaze kumalizika kwa hudna na kuanza kushambulia huku Urusi ikiwa nyuma yake... Kama vyombo mbalimbali vya habari vilivyoripoti: (Majeshi ya serikali ya Syria yametangaza leo Jumatatu kumalizika kwa hudna iliyodumu kwa siku saba kwa upatanishi wa Marekani na Urusi bila kuashiria uwezekano wowote wa kuifanya upya...) (Al Jazeera, 19/09/2016).
c- Kuzusha hitilafu na Urusi, na kila upande kuanza kumtuhumu mwenzake kuwa ndiye chanzo cha kufeli kwa hudna:
(Wizara ya Mambo ya Nje ya Marekani ilisema kuwa kutokana na ukiukaji huu wa wazi wa makubaliano ya kusitisha mapigano yaliyowekwa katika makubaliano ya hivi karibuni na Urusi, Marekani itatathmini upya uhusiano wote wa baadaye na Urusi katika suala la Syria...) (Al Jazeera Net, 20/09/2016)... (... Urusi na Marekani zimekuwa zikibadilishana tuhuma tangu siku kadhaa kuhusu kukwamisha utekelezaji wa makubaliano, kwani Moscow iliona kuwa Washington haikutekeleza wajibu wake katika hudna, haswa kuhusiana na kuainisha maeneo ya uwepo wa makundi ya upinzani na wanachama wa Jabhat Fath al-Sham, wakati Washington ilitishia kutofanya uratibu wa kijeshi na Urusi iwapo misaada haitaingizwa katika maeneo yaliyozingirwa...) (Al-Khaleej Online, 24/09/2016) Mwisho.
d- Marekani ilichochea hitilafu kati ya Pentagon na Wizara ya Mambo ya Nje, ikidaiwa kuwa Pentagon inapinga masharti ya hudna, kana kwamba hudna hiyo ilifanyika usiku mmoja bila Pentagon kujua! Ikumbukwe kuwa mazungumzo yalikuwa yakifanyika mbele yao, na kama wangekuwa na pingamizi wangepinga tangu mwanzo, na si baada ya hudna kumalizika. Hii ni pamoja na kuwa hudna iliyolazimishwa mnamo 12/09/2016 iliongezwa muda mnamo 14/09/2016 kwa idhini ya Pentagon! (... baada ya kutangazwa makubaliano ya kuongeza muda wa hudna nchini Syria kwa saa 48 nyingine, mwandishi wa "Al-Arabiya" huko Washington aliripoti kuwa Pentagon ilikaribisha nyongeza hiyo Jumatano jioni... Na mawaziri wa mambo ya nje wa Urusi na Marekani walitangaza, Jumatano, kuongezwa kwa usitishaji wa mapigano nchini Syria kwa saa 48 nyingine licha ya ukiukaji uliotokea tangu Jumatatu usiku, siku ya kwanza ya kuanza kwa hudna hiyo...) (Al-Arabiya, 15/09/2016).
8- Hivyo basi, usitishaji wa mapigano nchini Syria ulivunjika rasmi siku ya Jumatatu 19/09/2016 baada ya siku sita, yaani chini ya wiki moja tangu ulazimishwe na Marekani na Urusi. Ilitarajiwa kuwa Marekani na Urusi zingefanya mashambulizi ya pamoja dhidi ya wanamapinduzi nchini Syria, chini ya jina la "vita dhidi ya ugaidi" baada ya makubaliano hayo kudumu kwa siku saba, jambo ambalo halikufanyika kwa makusudi ya wazi kutoka kwa Marekani! Na Marekani ilianza "mapumziko ya mpiganaji" na mashambulizi zaidi, wakati huohuo ikifanya marekebisho ya hudna iliyopita kuelekea hudna inayofuata kwa dhana kuwa itaweza kupata mkutano unaowakutanisha serikali na upinzani kabla ya kumalizika kwa kipindi cha Obama...
Hiki ndicho kinachojiri sasa, na ndicho Marekani, washirika wake na vibaraka wake wanachofanya kazi kukifanikisha... Hivi ndivyo wanavyodai, lakini hali halisi ni kwamba mgogoro wa Syria ni mwiba, bali ni mti wa miba kwenye koo la Obama, wafuasi wake na watiifu wake. Ingawa alishatamka hapo awali wakati akiwa na nguvu zaidi kuliko sasa na alikuwa na muda mwingi zaidi kuliko alionao sasa, Rais wa Marekani Barack Obama alikiri katika hotuba yake kuhusu matatizo aliyokumbana nayo White House (kuwa vita vya Syria na mikutano iliyofanyika kuhusu mgogoro wa Syria ndiyo "iliyompatia mvi".... Obama alisema Alhamisi, tarehe 04/08 katika mkutano na waandishi wa habari kufuatia mkutano wake na Baraza la Usalama la Taifa na viongozi wa kijeshi katika Wizara ya Ulinzi ya Marekani, "Nina uhakika kabisa kuwa sehemu kubwa ya mvi kichwani mwangu imetokana na mikutano niliyoifanya kuhusu Syria"...) (Russia Today, 05/08/2016). Ikiwa alitamka hayo hapo awali, basi sasa bila shaka atatamka maneno makali zaidi na magumu zaidi kwake, akiondoka kwenye jumba lake jeusi akisema: "Syria imeniua"... Na ana haki ya kusema hivyo, kwani licha ya kuwa Syria haina ushindani wa kimataifa — ambapo Marekani ndiyo mtawala kimataifa ikimtumia Urusi na kuitenga Ulaya, na pia ndiyo mtawala kikanda, kwani nchi zenye nguvu kama Uturuki, Saudi Arabia na Iran ni watiifu kwa Marekani, na pia ndiyo inayodhibiti serikali na baadhi ya makundi... Pamoja na hayo yote, Marekani haijaweza pamoja na washirika, wafuasi na vibaraka wake kutekeleza mipango yake nchini Syria mpaka sasa, na zaidi ya miaka mitano imepita, huku ikipambana tu na watu wa Syria... Kwa hivyo si ajabu kwa Obama kupatwa na "kiwewe" (hysteria) kwa kutofanikiwa malengo yake. Hata vikosi vyake maalum alivyoingiza nchini Syria pamoja na wanajeshi wa Uturuki havikuweza kusimama kidete kwenye ardhi ya Syria, bali vilikimbia huku vikiandamwa na mayowe ya kulaaniwa. Na kutoka kwa nani? Kutoka kwa makundi ambayo Marekani iliyapa mafunzo na kudhani kuwa yamejisalimisha kwake!
Haya yote ni kwa sababu Syria na watu wa Syria wanatiririkwa na hisia za Kiislamu, na wanaathiriwa na nguvu za dhati zinazowapa uelewa na ufahamu zaidi, zikiwasukuma kusimama kidete dhidi ya vibaraka, wasaliti na mabwana zao kutoka kwa nchi za kikoloni zenye tamaa katika nchi za Waislamu. Itakuwaje pindi fikra za Kiislamu zitakapotiririka ndani yao, na kuongozwa na uongozi wa Kiislamu wa dhati utakaofanikisha kwao kauli ya Mtume wa Mwenyezi Mungu ﷺ katika hadith iliyonukuliwa na At-Tabarani katika Al-Mu’jam al-Kabir kutoka kwa Salama bin Nufail, amesema: Amesema Mtume wa Mwenyezi Mungu ﷺ:
«عُقْرُ دَارِ الْإِسْلَامِ بِالشَّامِ»
"Makao makuu ya nchi ya Kiislamu yako Sham."
Na kisha itachomoza kwao nchi ya Kiislamu, Khilafah Rashidah, Khilafah ya haki na uadilifu, itakayowarudisha kuwa mabwana wa dunia upya, Uislamu na watu wake ukatukuka, na ukafiri na watu wake ukadhalilika, na hilo kwa Mwenyezi Mungu si gumu.
وَيَوْمَئِذٍ يَفْرَحُ الْمُؤْمِنُونَ * بِنَصْرِ اللَّهِ يَنْصُرُ مَنْ يَشَاءُ وَهُوَ الْعَزِيزُ الرَّحِيمُ
"Na siku hiyo waumini watafurahi. Kwa nusura ya Mwenyezi Mungu; Humnusuru amtakaye, Naye ndiye Mwenye nguvu, Mwenye kurehemu." (QS. Ar-Rum [30]: 4-5)
23 Dhul-Hijjah 1437 H Sawa na 25/09/2016 M