(Silsila ya Majibu ya Mwanachuoni Mtukufu Ata Bin Khalil Abu al-Rashtah, Amir wa Hizbut Tahrir, kwa Maswali ya Wageni wa Ukurasa wake wa Facebook "Feqhi")
Jawabu la Swali
Hukum ya Kisheria kuhusu Bitcoin Kwa "SchukranJaan" na "Wisam Al-Haninny"
Swali la SchukranJaan:
Bismillahir-rahmanir-rahim,
Sheikh mpendwa mwenye kuheshimiwa.
Tunatumai unayo afya njema.
Tunakusalimu kwa salamu bora na tukufu kuliko zote:
Assalamualaykumwarahmatullahiwabarakatuhu.
Mimi na ndugu mmoja tulikuwa tukizungumza kuhusu hukmu inayohusiana na kununua na kuuza cryptocurrencies (sarafu za kidijitali za siri) kama bitcoin, ethereum, dash, ripple n.k.
Sisi sote tulisoma ijtihadi ya Ustadh Abu Khaled al-Hejazi lakini hatukuridhika kabisa na kile ambacho sheikh alikuwa amekihitimisha.
Tuna matatizo fulani na jinsi sheikh alivyochambua uhalisia wa cryptocurrencies na sehemu ya maoni chini ya makala hiyo pia imejaa ndugu wasiokubaliana na wakijadiliana kuhusu jinsi tahqeeq al-manaat (uchunguzi wa uhalisia) ulivyokuwa hauko sahihi kabisa.
Tungependa kujua hukmu inayohusiana na kuuza na kununua cryptocurrencies.
Je, unaweza kutoa mwanga juu ya suala hili, kwa sababu bado halionekani kuwa wazi kwetu.
Wajazaakumullahukhairan
Mwenyezi Mungu atupe nguvu sote katika njia yake na atujalie kuwa sababu ya kusimamishwa tena kwa mbeba nuru katika ulimwengu huu, Khilafah kwa njia ya Utume.
Ameen
Swali la Wisam Al-Haninny:
Assalam Alaykum, inaonekana swali halitajibiwa na ninaelewa shinikizo mlilo nalo, Mwenyezi Mungu awasaidie...
Lakini nina swali ambalo haliwezi kusubiri kwa sababu naona limeenea miongoni mwa watu na hususan Waislamu kwa kiwango cha ajabu katika miezi ya hivi karibuni...
Swali: Sarafu ya Bitcoin ni sarafu iliyoanza miaka 8 iliyopita na sasa imeenea kwa kiwango kisichokuwa na kifani na thamani ya sarafu moja imefikia zaidi ya dola 8000, na kupitia ufuatiliaji wangu wa uhalisia wake na jinsi inavyoshughulikiwa, sijaona tofauti kati yake na dola isipokuwa kwamba dola inaonekana na ni ya kimaada? Kwa hiyo ninaomba utuchambulie Sheikh wetu hukmu ya kisheria kutoka pande kadhaa kama ifuatavyo: 1- Kushughulika nayo kwa kununua na kuuza. 2- Mining (uchimbaji) "ambao ni kutengeneza sarafu mpya". 3- Hukum ya kubadilishana (sarfu) kati yake na sarafu nyingine zinazoonekana? Na mkipenda niwape tovuti na YouTube zinazoelezea uhalisia wake basi niko tayari, lakini nadhani ni rahisi kuzifikia, na Mwenyezi Mungu awabariki.
Jibu:
Wa Alaykum Salam wa Rahmatullahi wa Barakatuh,
Kuhusu maswali yenu mawili juu ya Bitcoin, tulishajibu swali kama hili mnamo tarehe 28/04/2017 na hili hapa ni nukuu ya jibu hilo:
(1- Kuhusu Bitcoin, hiyo si sarafu, hivyo masharti ya sarafu hayatumiki kwake, kwa sababu fedha ambayo Mtume ﷺ aliidhinisha - ambayo ni Dinari na Dirham - ilikuwa na mambo matatu:
- Ilikuwa ni kipimo cha bidhaa na huduma, yaani, ilikuwa na sifa ya ufedha (illatun naqdiyyah), yaani ilikuwa ni thamani (athman) na ujira.
- Ilikuwa inatolewa na mamlaka inayojulikana, si mamlaka isiyojulikana inayotoa Dinari na Dirham...
- Kwamba fedha hizo zilikuwa zimeenea miongoni mwa watu wote na si maalum kwa kundi fulani tu...
Kwa kuyatumia hayo kwa Bitcoin, inabainika kuwa mambo haya matatu hayajapatikana ndani yake:
- Hivyo si kipimo cha bidhaa na huduma kwa ujumla wake, bali ni chombo tu cha kubadilishana bidhaa na huduma fulani...
- Haitolewi na mamlaka inayojulikana, bali ni mamlaka isiyojulikana...
- Haijaenea miongoni mwa watu wote, bali ni maalum kwa wale wanaoitumia na kukubali thamani yake, yaani si ya jamii nzima...
Kwa hiyo, sarafu ya Bitcoin si fedha (naqd) kwa mtazamo wa kisheria.
2- Hivyo basi, Bitcoin si chochote zaidi ya kuwa ni bidhaa, lakini bidhaa hii ina chanzo kisichojulikana, na haina mdhamini, kisha ni uwanja mkubwa wa utapeli, udanganyifu, kamari na hila. Hivyo basi, haijuzu kuiuza wala kuinunua, hasa kwa kuwa chanzo chake kisichojulikana kinaleta mashaka kwamba chanzo hiki kiko karibu na nchi kubwa za kirasimali, hususan Amerika... au genge linalofungamana na nchi kubwa lenye lengo ovu... au makampuni makubwa ya kimataifa ya kamari, biashara ya madawa ya kulevya, utakatishaji fedha na uendeshaji wa uhalifu wa kupangwa... Vinginevyo, kwa nini chanzo chake kibaki hakijulikani?
Kwa ufupi, ni bidhaa yenye chanzo kisichojulikana ambayo haina mdhamini, inakabiliwa na operesheni za utapeli na udanganyifu, na udhibiti wa nchi za kirasimali za kikoloni, hususan Amerika, ili kutumia mambo haya kupora utajiri wa watu... Kwa hiyo, haijuzu kuinunua kutokana na dalili za kisheria zinazokataza kununua na kuuza kila bidhaa isiyojulikana (majhul), na miongoni mwa dalili za hilo ni:
- Muslim ametoa katika Sahih yake kutoka kwa Abu Hurairah, amesema:
نَهَى رَسُولُ اللهِ ﷺ عَنْ بَيْعِ الْحَصَاةِ، وَعَنْ بَيْعِ الْغَرَرِ
"Mtume wa Mwenyezi Mungu ﷺ amekataza biashara ya kujiwe (bay’ al-hasah), na biashara ya udanganyifu (bay’ al-gharar)." (HR Muslim)
Na kadhalika Tirmidhi ametoa kutoka kwa Abu Hurairah... "Biashara ya kijiwe" (bay' al-hasah) ni kama mtu kusema: nimekuuzia katika nguo hizi ile ambayo kijiwe nitakachorusha kitaiangukia, au nimekuuzia ardhi hii kuanzia hapa mpaka pale kijiwe hiki kitakapoishia... Hivyo kitu kinachouzwa hakijulikani na hilo limekatazwa... "Biashara ya gharar" yaani kitu kisichojulikana, kisichokuwa na maelezo wazi, kama kuuza samaki aliye ndani ya maji mengi, maziwa yaliyo ndani ya kiwele, na kuuza mimba iliyo tumboni na mfano wa hayo. Biashara ya hayo yote ni batili kwa sababu ni gharar (udanganyifu/hatari)...
Na kutokana na hilo, inabainika uharamu wa biashara ya gharar au bidhaa isiyojulikana, na hili linaambatana na uhalisia wa Bitcoin, kwani ni bidhaa yenye chanzo kisichojulikana, na hakuna chombo rasmi kilichoitoa ambacho kinaweza kuwa mdhamini wake. Hivyo basi, haijuzu kuiuza wala kuinunua.) Mwisho.
Ndugu yenu, Ata bin Khalil Abu al-Rashtah
30 Rabi’ al-Awwal 1439 Hijria Sawa na 18/12/2017 Miladi
Kiungo cha jibu kutoka kwenye ukurasa wa Amir kwenye Facebook
Kiungo cha jibu kutoka kwenye ukurasa wa Amir kwenye Google Plus
Kiungo cha jibu kutoka kwenye ukurasa wa Amir kwenye Twitter
Kiungo cha jibu kutoka kwenye ukurasa wa Amir Web