Alhamdu Lillahi kwa neema za Mwenyezi Mungu, na sala na salamu zimwendee Mtume wa Mwenyezi Mungu, na familia yake, maswahaba zake, na waliomfuata. Baada ya hayo.
Kwa Umma wa Kiislamu, umma bora uliotolewa kwa wanadamu... na kwa wabebaji Da'wah wema na watukufu... na kwa wageni watukufu wa ukurasa huu,
Assalamu Alaikum Warahmatullahi Wabarakatuh,
Hakika katika historia ya mataifa kuna siku zenye kung’ara ambazo ni fahari kwa mataifa hayo. Itakuwaje ikiwa siku hizo ni sehemu ya utimilifu wa bishara ya Mtume wa Mwenyezi Mungu (saw)? Bila shaka zitakuwa nyota zinazomereta angani, bali ni jua zinazoangaza ulimwengu na kuuinuatua Umma hadi kilele cha mbingu... Na miongoni mwa siku hizi ni siku zetu hizi tukufu, siku za kumbukumbu ya ukombozi wa Constantinople... Mkombozi (Al-Fatih) alianza uvamizi na kuizingira Constantinople kuanzia tarehe 26 Rabi' al-Awwal mpaka ukombozi ulipotimia alfajiri ya Jumanne, tarehe 20 ya mwezi huu huu, Jamada al-Ula 857 H. Hii ina maana kuwa mzingiro ulidumu kwa takriban miezi miwili. Wakati Muhammad al-Fatih alipoingia mjini akiwa mshindi, alishuka kwenye farasi wake na kusujudu kwa kumshukuru Mwenyezi Mungu kwa ushindi huu na mafanikio haya. Kisha alielekea kwenye kanisa la "Hagia Sophia", ambapo wananchi wa Byzantium na watawa wao walikuwa wamejikusanya, akawapa amani na kuamuru kugeuzwa kwa kanisa la "Hagia Sophia" kuwa msikiti. Pia aliamuru kujengwa kwa msikiti sehemu ya kaburi la Swahaba mtukufu "Abu Ayyub al-Ansari", ambaye alikuwa miongoni mwa safu za kampeni ya kwanza ya kuivamia Constantinople na alifariki huko, Mwenyezi Mungu amrehemu na awe radhi naye...
Al-Fatih, ambaye alipewa lakabu hiyo (Mkombozi) baada ya ushindi, aliamua kuifanya Constantinople kuwa mji mkuu wa dola yake badala ya mji wa Edirne. Baada ya kuikomboa, aliipa Constantinople jina la "Islampol", likimaanisha mji wa Uislamu au "Dar al-Islam", na ikajulikana kama "Istanbul". Kisha Al-Fatih akaingia mjini na kuelekea Hagia Sophia akaswali humo, na ikawa msikiti kwa fadhila na neema za Mwenyezi Mungu na sifa zake... Ikaendelea kuwa msikiti tohara na wenye kung’ara ukijazwa na waumini mpaka mhalifu wa zama hizi, Mustafa Kemal, alipoweza kuzuia swala ndani yake na kuuchafua kwa kuufanya kuwa makumbusho kwa wapita njia!
Hivyo ndivyo ilivyotimia bishara ya Mtume wa Mwenyezi Mungu (saw) katika hadithi yake tukufu kutoka kwa Abdullah bin Amr bin al-Aas aliyesema:
بَيْنَمَا نَحْنُ حَوْلَ رَسُولِ اللَّهِ ﷺ نَكْتُبُ إِذْ سُئِلَ رَسُولُ اللَّهِ ﷺ أَيُّ الْمَدِينَتَيْنِ تُفْتَحُ أوَّلاً قُسْطَنْطِينِيَّةُ أو رُومِيَّةُ؟ فَقَالَ رَسُولُ اللَّهِ ﷺ: مَدِينَةُ هِرَقْلَ تُفْتَحُ أوَّلاً، يَعْنِي قُسْطَنْطِينِيَّةَ
"Wakati tukiwa karibu na Mtume wa Mwenyezi Mungu (saw) tukiandika, Mtume wa Mwenyezi Mungu (saw) aliulizwa: Ni mji gani kati ya miwili utakaokombolewa kwanza, Constantinople au Roma? Mtume wa Mwenyezi Mungu (saw) akasema: 'Mji wa Heraclius ndio utakaokombolewa kwanza, yaani Constantinople'." (Imepokelewa na Ahmad katika Musnad yake na al-Hakim katika al-Mustadrak).
Pia katika hadithi tukufu kutoka kwa Abdullah bin Bishr al-Khath’ami kutoka kwa baba yake, kwamba alimmsikia Mtume (saw) akisema:
لَتُفْتَحَنَّ الْقُسْطَنْطِينِيَّةُ فَلَنِعْمَ الْأَمِيرُ أَمِيرُهَا وَلَنِعْمَ الْجَيْشُ ذَلِكَ الْجَيْشُ
"Hakika mtakuja kuikomboa Constantinople; amiri bora ni amiri wake, na jeshi bora ni jeshi hilo." (Imepokelewa na Ahmad).
Bishara hii ilitokea mikononi mwa kijana huyu, Muhammad al-Fatih, ambaye hakuwa amevuka umri wa miaka ishirini na mmoja, lakini alikuwa ameandaliwa maandalizi ya sawasawa tangu utotoni mwake. Baba yake, Sultan Murad II, alimjali sana na kumfanya asome kwa walimu bora wa zama zake, akiwemo "Ahmad bin Ismail al-Kurani", ambaye al-Suyuti alimtaja kuwa mwalimu wa kwanza wa Al-Fatih na kusema juu yake: "Alikuwa mwanachuoni mwanahaki (faqih), wanachuoni wa zama zake walimshuhudia kwa ubora na umakini, bali walikuwa wakimwita: Abu Hanifa wa zama zake". Kadhalika Sheikh "Aq Shamsuddin Sunqur" ambaye alikuwa wa kwanza kupandikiza akilini mwake tangu utotoni hadithi ya Mtume wa Mwenyezi Mungu (saw) kuhusu "ukombozi wa Constantinople", na kijana huyo akakua akiwa na shauku ya kuleta ukombozi huo mikononi mwake... Sheikh "Aq Shamsuddin" alimfundisha Muhammad al-Fatih elimu za kimsingi za Qur'an, Hadithi, Sunnah za Mtume na Fiqh, pamoja na lugha za Kiarabu, Kiajemi, na Kituruki, na pia alimfundisha baadhi ya elimu za maisha kama hisabati, falaki, na historia... Hii ikiwa ni pamoja na ushujaa wake katika upandaji farasi na sanaa za mapigano... Mwenyezi Mungu akamtukuza kwa hisani na fadhila Zake, akastahili sifa za Mtume (saw). Al-Fatih alikuwa kiongozi bora na jeshi lake lilikuwa jeshi bora, nyoyo zao zilijawa na imani na viungo vyao vikaelekea kwenye maandalizi na ukweli wa Jihad. Walimnusuru Mwenyezi Mungu na Yeye akawanusuru kwa ukombozi huu mkuu, sifa zote njema ni za Mwenyezi Mungu, Mola wa walimwengu wote.
Al-Fatih alikuwa na maono makini na busara kubwa. Kila alipoona pengo alitibu kwa njia yake kwa idhini ya Mwenyezi Mungu, na kila kizuizi kilipojitokeza alikiondoa kwa msaada wa Mwenyezi Mungu. Alikumbana na vizuizi vitatu ambavyo alivitatua kwa akili ya hali ya juu:
Jeshi lake lilimlalamikia baridi kali wakiwa nje ya kuta za mji, akawajengea ngome ya kujikinga kila ilipobidi. Hakutaka jeshi livunje mzingiro ikiwa utachukua muda mrefu na kurudi kama yalivyofanya majeshi ya awali ya Waislamu, bali alitaka kusiwe na kurudi isipokuwa Constantinople ikombolewe kwa idhini ya Mwenyezi Mungu.
Kuta za Constantinople zilikuwa na matabaka matatu na kati ya kila tabaka kulikuwa na mita kadhaa. Hivyo Al-Fatih alikuwa na wasiwasi juu ya suala hili, kwani katika zama zao hapakuwa na silaha zenye nguvu kubwa za uharibifu. Silaha yenye nguvu zaidi ilikuwa ni manjaniq (tirungi) ambayo ilirusha mawe makubwa lakini hayakuwa yanatosha kutoboa ukuta wa ukubwa ule. Kwa sababu Muhammad al-Fatih alikuwa akifuatilia uwezo wa kijeshi duniani, alipata habari kuwa mhandisi mmoja wa Kihungaria (Orban) alikuwa ameandaa wazo la kutengeneza mizinga yenye nguvu maalum inayoweza kubomoa kuta. Orban alikuwa ametoa huduma zake kwa mfalme wa Constantinople lakini hakujaliwa, hivyo Al-Fatih alimpokea vizuri na kumpa mali nyingi na kumsahilishia kila njia ya kukamilisha uvumbuzi wake. Orban akaanza kutengeneza mizinga akisaidiwa na wahandisi wa Kiothmaniyya, na Al-Fatih alikuwa akiwasimamia yeye mwenyewe. Kabla ya miezi mitatu kupita, Orban alikuwa ameshaunda mizinga mitatu mikubwa, uzito wa kombora la mzinga ukiwa takriban tani moja na nusu. Hakutaka kuijaribu mizinga hiyo karibu na kuta akihofia matokeo yasiwe kama inavyotakiwa na kuonekana na Waroma nyuma ya kuta, jambo ambalo lingeweza kuathiri nguvu ya Waislamu. Hivyo alifanya jaribio huko "Edirne" na likafanikiwa, akamshukuru Mwenyezi Mungu na kuisafirisha mizinga ile mitatu kutoka Edirne hadi karibu na kuta za Constantinople ili kuzibomoa na kuwafanya Waroma wasalimu amri...
Kisha kulikuwa na jambo jingine lililomshughulisha. Alijua kuwa kuta zilikuwa dhaifu katika eneo la Ghuba (Golden Horn) karibu na Constantinople. Ingawa Waroma walijua udhaifu wa kuta upande wa Ghuba, walikuwa na uhakika kuwa meli za Waislamu hazingeweza kuwafikia kwa sababu mlango wa Ghuba ulikuwa umefungwa kwa mnyororo wa chuma. Lakini Al-Fatih, ambaye Mwenyezi Mungu alimfungulia njia, alifikia uamuzi wa kuzitelezesha meli kupitia nchi kavu kwenye kilima cha (Galata) kinachokabiliana na kuta upande wa Ghuba. Aliweka mbao kwenye kilele cha kilima na kumwaga kiasi kikubwa cha mafuta na grisi, kisha akazitelezesha meli juu yake. Katika usiku mmoja, aliweza kuingiza meli 70 kwenye Ghuba. Jambo hilo liliwashangaza Waroma; asubuhi ilipofika na walipoona meli za Waislamu ziko ndani ya Ghuba, nyoyo zao zilijawa na hofu, na ushindi na ukombozi ukapatikana, sifa zote ni za Mwenyezi Mungu, Mola wa walimwengu wote.
Enyi ndugu, nimependa kuwarejeshea sehemu ya ukombozi wa Constantinople kwa sababu tatu:
Kwanza: Ili kurejesha kumbukumbu na kila mwenye macho aone jinsi gani Uislamu na Waislamu walivyo na utukufu pale Uislamu wao unapowekwa katika vitendo. Wakati huo ukafiri hauwezi kusimama, bali haki hupanda na kupaa juu kama adhana (Allahu Akbar). Na hivyo ndivyo ilivyokuwa, kwani Uajemi na Byzantium zilinyenyekea mbele yake, na hivi karibuni Roma, dada wa Byzantium, itafuata, ikiwa ni uthibitisho wa sehemu nyingine ya bishara ya Mtume (saw) kuhusu kukombolewa kwa Roma...
Pili: Ili nyoyo zenu zitue kwa kutimia kwa bishara tatu nyingine za Mtume (saw) kama bishara ya kwanza ilivyotimia. Mtume (saw) alitubashiria ukombozi wa Constantinople, ukombozi wa Roma, kurejea kwa Khilafah kwa njia ya Utume, na kupigana na Mayahudi na kuwashinda vibaya... Na Mtume (saw) hasemi kwa matamanio, bali ni wahyi uliofunuliwa. Bishara tatu zilizobaki za Mtume (saw) zitatimia kwa idhini ya Mwenyezi Mungu, lakini hazitatimia kwa kuteremka malaika kutoka mbinguni wakituletea zawadi, bali sunna ya Mwenyezi Mungu ni sisi tumnusuru Mwenyezi Mungu naye atatunusuru. Hivyo, tusimamishe sheria Yake, tuinue jengo la Dola Yake, na tuandae nguvu tuwezavyo kisha tupigane Jihad katika njia Yake. Na hapo ndipo ardhi itang’ara kwa bishara tatu zilizobaki na ardhi itang’ara kwa Khilafah upya...
Tatu: Kwani Magharibi kafiri, ikiwa imeshirikiana na wasaliti wa Kiarabu na Kituruki, iliweza kuivunja Khilafah mwaka 1342 H - 1924 M, na kuuchukulia uvunjifu huo kama hatua ya kulingana na ukombozi wa Constantinople. Hivyo, Magharibi ilipata tena nguvu iliyokuwa imepoteza. Lengo la Magharibi likawa ni kufanya kila juhudi ili Khilafah isirejee tena, ili isipoteze nguvu hiyo iliyoipata, hasa ikizingatiwa kuwa yenyewe ndiyo mkoloni wa nchi za Waislamu. Ilikuwa ikifuatilia harakati katika nchi za Waislamu, na wakati ulipotangazwa kuundwa kwa Hizb ut Tahrir mwaka 1372 H - 1953 M, ikabainika kwa Magharibi kuwa msingi wa kazi ya Hizb na kadhia yake kuu ni kurejesha Khilafah upya. Ilipoona Hizb iko thabiti na makini katika kazi yake, Magharibi iliwaamuru vibaraka wake watawala kuipiga marufuku Hizb, kuifuata kwa ukamataji, mateso hadi kuuawa kishahidi katika baadhi ya maeneo, na kisha kwa vifungo virefu vilivyofikia kifungo cha maisha katika maeneo mengine... Kisha wakaongeza mbinu za uongo, uzushi na kubadilisha ukweli bila haya wala aibu... Na ili kashfa hizi ziwe na athari kulingana na dhana yao, waliwafanya wale wanaozitekeleza kuwa ni watu wenye majina ya Kiislamu na mavazi ya Kiislamu. Kisha wakajiunga nao katika uzushi huu baadhi ya wale walioacha kazi, waliovunja ahadi, na walioadhibiwa miongoni mwa wale waliokuwa ndani ya Hizb hapo awali...
Hivyo, makundi haya yote yakashirikiana katika uzushi, kughushi, na kubadilisha ukweli, na kila mmoja wao ana jukumu lake: makafiri, wanafiki, wanaoeneza uvumi, na kisha kikundi kidogo cha walioacha, walioadhibiwa, walioasi, na wale ambao nyoyo zao zina ugonjwa. Wote walishirikiana katika hila hii dhidi ya Hizb na kuizushia, wakitembea katika hatua zenye sumu na kutumia uongo katika hatua zao zote. Kila wanapofeli katika uzushi mmoja, huleta mwingine. Na waongo hawa walisahau au walijifanya kusahau kuwa vijana wa Hizb wana usafi wa akili, wepesi wa kufahamu, na akili ya kina inayowafanya wapambanue kati ya kiovu na kizuri, hivyo hawaachi uongo ukaingia ndani ya kambi yao... Hivyo, licha ya mbinu za kurembesha uzushi walizochukua, na licha ya viwanda vya urembo kwa ajili ya kughushi ukweli walivyojichosha kuvitengeneza, hazikupata sikio la kusikiliza miongoni mwa vijana wa Hizb wala kwa muislamu yeyote mwenye akili. Bali zilikuwa:
فَسَرَابٍ بِقِيعَةٍ يَحْسَبُهُ الظَّمْآنُ مَاءً حَتَّى إِذَا جَاءَهُ لَمْ يَجِدْهُ شَيْئاً
"…kama sarabi katika tambarare, mwenye kiu anaidhania kuwa ni maji; mpaka atakapoifikia haikuti kuwa ni kitu." (QS. An-Nur [24]: 39)
Na licha ya kila vitimbi viovu na ubaya walioufanya dhidi ya Hizb na uongozi wake wakidhani kuwa wataathiri Hizb, dhana yao iliwaangamiza na kisha watageuka kwa idhini ya Mwenyezi Mungu wakiwa wamefeli bila kupata kheri yoyote, hata kama uongo wao, hila zao na vitimbi vyao vitakuwa virefu kiasi gani:
وَلَا يَحِيقُ الْمَكْرُ السَّيِّئُ إِلَّا بِأَهْلِهِ
"…na vitimbi vibaya haviwasibu ila wale wenye navyo." (QS. Fatir [35]: 43)
Na watakuta malipo ya hayo kwa Mwenyezi Mungu hata kama uzushi na vitimbi vyao vitakuwa vikubwa kiasi gani:
وَقَدْ مَكَرُوا مَكْرَهُمْ وَعِنْدَ اللَّهِ مَكْرُهُمْ وَإِنْ كَانَ مَكْرُهُمْ لِتَزُولَ مِنْهُ الْجِبَالُ
"Na hakika walifanya vitimbi vyao, na vitimbi vyao viko kwa Mwenyezi Mungu, na hata kama vitimbi vyao ni vya kuondolewa milima (havitamdhuru Mwenyezi Mungu)." (QS. Ibrahim [14]: 46)
Kwa kuhitimisha, msimamo wenu imara, enyi ndugu, mliosimama kwenye haki, msimamo safi na wenye nguvu mbele ya kampeni mfululizo dhidi ya Da'wah ya haki, unatukumbusha msimamo wa Maswahaba (ra) tukimfuata Mtume (saw) katika msimamo wake wa hekima na utukufu wakati wa kukabiliana na dhiki... Hivyo ndivyo ilivyo msimamo wenu, msimamo mgumu na imara usiodhoofika na mitihani wala kuyumba wakati wa fitna, bali azma zenu huongezeka na koo zenu hupaza sauti ya haki. Mnaitazama dunia mara moja na kuitazama akhera mara nyingi. Hongera kwa Hizb kuwa nanyi na hongera kwenu kuwa ndani ya Hizb.
رِجَالٌ لَا تُلْهِيهِمْ تِجَارَةٌ وَلَا بَيْعٌ عَنْ ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ يَخَافُونَ يَوْماً تَتَقَلَّبُ فِيهِ الْقُلُوبُ وَالْأَبْصَارُ * لِيَجْزِيَهُمُ اللَّهُ أَحْسَنَ مَا عَمِلُوا وَيَزِيدَهُمْ مِنْ فَضْلِهِ وَاللَّهُ يَرْزُقُ مَنْ يَشَاءُ بِغَيْرِ حِسَابٍ
"Watu ambao biashara wala kuuza hakuwashughulishi na kumdhukuru Mwenyezi Mungu, na kushika Sala, na kutoa Zaka. Wanaiogopa siku ambayo nyoyo na macho yatageuzika. Ili Mwenyezi Mungu awalipe bora ya yale waliyoyatenda, na awazidishie katika fadhila zake. Na Mwenyezi Mungu humruzuku amtakaye bila ya hesabu." (QS. An-Nur [24]: 37-38)
Mwisho wa yote, ninamuomba Mwenyezi Mungu (swt) kuwa utimilifu wa bishara za Mtume (saw) uendelee, ili Khilafah ya Umma huu irejee, na kisha kuikomboa Al-Quds, na kuikomboa Roma kama ilivyotangulia dada yake... ikiwa ni uthibitisho wa hadithi za Mtume (saw)... Pia tunamuomba (swt) atusaidie kwa nusura kutoka Kwake ili tufanye kazi vizuri na kwa umakini ili tustahili nusura ya Mwenyezi Mungu Mwenye Nguvu, Mwenye Kurehemu.
وَيَوْمَئِذٍ يَفْرَحُ الْمُؤْمِنُونَ * بِنَصْرِ اللَّهِ يَنْصُرُ مَنْ يَشَاءُ وَهُوَ الْعَزِيزُ الرَّحِيمُ
"Na siku hiyo waumini watafurahi. Kwa nusura ya Mwenyezi Mungu. Yeye humnusuru amtakaye, Naye ni Mwenye nguvu, Mwenye kurehemu." (QS. Ar-Rum [30]: 4-5)
Wassalamu Alaikum Warahmatullahi Wabarakatuh.
Alhamisi, 7 Jamada al-Ula 1441 H | Ndugu Yenu Inayolingana na 02/01/2020 M | Ata Bin Khalil Abu Al-Rashtah Amir wa Hizb ut Tahrir